Ganeshotsav 2023 : गणेशोत्सव काळात विविध वस्तूंपासून गणपती बनवत कलाकार आपल्यातील कलेची चुणूक दाखवतात. यंदा डोंबिवलीतील अगरबत्ती उत्सवात चक्क पावणे दोन लाख अगरबत्त्यांपासून आकर्षक गणपतीची कलाकृती साकारण्यात आली आहे. दोन ते तीन दिवसांत ही कलाकृती साकारण्यात आली असून ती सध्या डोंबिवलीकरांचे आकर्षणाचे केंद्रबिंदू ठरत आहे.

गणेशोत्सवच्या पार्श्वभूमीवर डोंबिवली बालभवन येथे एचएसबीच्या वतीने अगरबत्ती उत्सव भरविण्यात आला आहे. या उत्सवात पर्यावरण पूरक विविध सुगंधाच्या अगरबत्ती मांडण्यात आल्या आहेत.

या उत्सवाचे केंद्रबिंदू ठरत आहे ते अगरबत्तीमधून साकारलेले गणेश. याविषयी माहिती देताना आशिष वैद्य म्हणाले, अगरबत्ती उत्सवाचे यंदाचे हे 10 वे वर्ष आहे. दरवर्षी काही तरी नवीन घेऊन येण्याचा आमचा प्रयत्न असतो. अगरबत्ती पासून काही करता येईल का याचा विचार सुरू असतानाच काही आर्टिस्ट लोकांशी आम्ही बोललो. आणि अगरबत्ती मधून बाप्पा सकारायचे ठरले.

आर्टिस्ट लोकांची वेळ न मिळाल्याने आमच्या सहकाऱ्यांनीच दोन ते तीन दिवसांच्या कालावधीत हा बाप्पा साकारला. सुमारे पावणे 2 लाख काड्यांपासून गणेशाची कलाकृती बनविण्यात आली आहे. 200 ते 225 किलो त्याचे वजन आहे. एकही अगरबत्तीची काडी एकमेकांना न चिटकवता ही गणेशाची कलाकृती साकारण्यात आली आहे असे सांगितले.

दरवर्षीच या प्रदर्शनात अगरबत्तीपासून एखादी आकर्षक कलाकृती ग्राहकांसाठी सादर केली जाते. विविध रंगांतील आणि आकारांच्या अगरबत्त्यांपासूनच या कलाकृती तयार केल्या जातात असे ते म्हणाले.

हा उत्सवाला आतापर्यंत कल्याण डोंबिवलीकरांसह ठाणे, नवी मुंबई, अंबरनाथ, बदलापूर येथील नागरिकांनी देखील भेट दिली आहे. हा बाप्पा लहान मोठ्यांसह साऱ्यांच्याच आकर्षणाचा विषय बनत आहे.