Navratri 2023 : आजपासून नवरात्रीला सुरुवात झाली आहे. आज घटस्थापनेसाठी सर्वोत्तम मुहूर्त सकाळी ०८ ते १२.३० असा आहे असे ज्योतिष्य विश्वगुरू डॉ. अनिल वैद्य यांनी सांगितले.

शास्त्रानुसार या दिवशी आपापल्या कुळाचाराप्रमाणे घटस्थापना करावी. नवरात्र काळात १७ ऑक्टोबरला सूर्य तूळ राशीत प्रवेश करेल. तर १८ ऑक्टोबरला विनायक चतुर्थी असून बुध तूळ राशीत प्रवेश करणार आहे. १९ ऑक्टोबरला ललिता पंचमी असून उपांग ललिता पूजन करावे. २० ऑक्टोबरला सरस्वती आवाहन करून २१ ऑक्टोबरला सरस्वती व महालक्ष्मी पूजन करावे. २२ ऑक्टोबरला महाअष्टमीचा उपवास करावा.

२३ ऑक्टोबरला नवमी उपवास करून नवरात्र उत्सवाची समाप्ती केली जाईल. या दिवशीच हेमंत ऋतूचा प्रारंभ होत आहे. हा नवरात्रीमधला अतिशय शुभ दिवस असतो.

शास्त्रानुसार ज्या देवतेचे नवरात्र असेल त्यांची पूजा करताना फुलांनी पाणी शिंपडून स्नान इत्यादी उपचार करावेत. इतर देवतांना नेहमीप्रमाणे ताम्हणात अभिषेक करावा आणि त्यांची स्वतंत्रपणे पूजा करावी. काही ठिकाणी गैरसमजामुळे घट बसविल्यानंतर इतर देवांची पूजा करीत नाहीत. हे शास्त्रानुसार योग्य नाही, असे डॉ. वैद्य म्हणाले.

प्रकृतीच्या किंवा वयोमानामुळे नवरात्राचे उपवास रोज करणे शक्य नसेल तर दोन दिवस उपवास करावा. अथवा फक्त अष्टमीचा उपवास करावा. हे नसेल जमत तर नऊ दिवस रोज भाजके खावे.

अशौचामुळे नवरात्रातील काही दिवस पूजेसाठी मिळत असतील तर अशावेळेस सात दिवस, पाच दिवस, तीन दिवस एक दिवसाचे सुद्धा नवरात्र करता येते.

ज्योतिषशास्त्रानुसार १५ रोजी केशरी रंग,१६ रोजी पांढरा,१७ रोजी लाल ,१८ रोजी निळा, १९ रोजी पिवळा,२० रोजी हिरवा ,२१ रोजी ग्रे, २२ रोजी गुलाबी २३ ऑक्टोबरला जांभळा रंग वापरावा, असे डॉ. वैद्य यांनी सांगितले.