पुणे - शक्ती आणि भक्तीचे प्रतीक असलेल्या आदिशक्तीच्या शारदीय नवरात्रोत्सवाला रविवारपासून (ता. १५) सुरुवात होत आहे. यात महालक्ष्मीची आराधना करण्यासाठी सामुदायिक श्रीसूक्त पठणाचे आयोजन केले आहे. सारसबाग येथील महालक्ष्मी मंदिरासमोर उत्सवाच्या दुसऱ्या माळेला म्हणजे सोमवारी (ता. १६) हा उपक्रम होईल. महालक्ष्मी मंदिराने हा उपक्रम आयोजित केला आहे.

‘सकाळ माध्यम समूह’ आणि ‘विश्वकर्मा विद्यापीठा’चे या उपक्रमाला सहकार्य लाभले आहे. सकाळी सहा वाजता महालक्ष्मी मंदिरासमोर प्रसन्न वातावरणात श्रीसूक्ताचे महिला सामुदायिकरीत्या पठण करतील. ध्यानधारणेने कार्यक्रमाला प्रारंभ होईल. त्यानंतर ॐकार, शंखनाद आणि श्रीगणेश अथर्वशीर्षाचे पठण केले जाईल. त्यानंतर सामुदायिक श्रीसूक्त पठणाला सुरुवात होईल. फलश्रुती आणि आरतीने सांगता होईल.

शंखनाद, मंत्रोच्चार आणि सूक्तपठणातून निर्माण होणाऱ्या चैतन्यदायी वातावरणाचे साक्षीदार होण्याची आणि त्यात सहभागी होण्याची संधी यानिमित्ताने मिळणार आहे. नवरात्रोत्सवात घरोघरी देवीची आराधना आणि उपासना केली जाते. या आराधनेतील महत्त्वाचा भाग म्हणजे श्रीसूक्त. हे वैदिक सूक्त असून ते महालक्ष्मीची आराधना करणारे सूक्त आहे. ऋग्वेदातील खिलसूक्तात ते दिलेले आहे. लक्ष्मीचे वर्णन या सूक्तात केले आहे.

या कार्यक्रमाला आगामी ‘श्यामची आई’ या चित्रपटातील अभिनेत्री गौरी देशपांडे उपस्थित राहणार आहेत.