दीपावलीचे दिवस सुरू होण्यापूर्वी गोवत्सद्वादशी- वसूबारस आणि गुरुद्वादशी येत असते. आश्विन कृष्ण द्वादशी प्रदोषकाली असेल त्यादिवशी गोवत्सद्वादशी- वसूबारस साजरी केली जाते. दोन दिवशी प्रदोषकाल व्यापिनी असेल तर पूर्वदिवसाची घ्यावी असे शास्त्र ग्रंथात सांगण्यात आले आहे. यावर्षी मंगळवार २ नोव्हेंबर २०२१ आश्विन कृष्ण द्वादशीच्या दिवशी ‘ गुरुद्वादशी ‘आहे. गुरुद्वादशी हा श्रीदत्तात्रेयाचे एक अवतार श्रीपाद श्रीवल्लभ यांच्या पुण्यतिथीचा दिवस आहे. या दिवशी दत्तमंदिरात गुरूद्वादशीनिमित्त दीपोत्सव केला जातो.

गुरुचरित्रात म्हटले आहे,

आश्विन वद्य द्वादशीसी । नक्षत्र मृगराज परियेसी ।

श्रीगुरु बैसले निजानंदेसी । अदृश्य झाले गंगेत ॥

या दिवशी नरसोबाच्या वाडीस पूजन, दीपोत्सव, कथा-कीर्तन, गुरुचरित्राची पारायणे, संतर्पणे वगैरे कार्यक्रम होतात.

श्रीपाद श्रीवल्लभ

श्रीपाद श्रीवल्लभ हे १४ व्या शतकात दत्तसंप्रदायातील एक महापुरुष होऊन गेले. गुरुचरित्र ग्रंथातील पाच ते दहा अध्यायात त्यांची अवतार कथेचे वर्णन केलेले आहे. श्रीपाद श्रीवल्लभ यांचा जन्म तामिळनाडूमध्ये गोदावरी जिल्ह्यातील पीठापूर येथे झाला. त्यांच्या पित्याचे नाव आपळराज आणि मातेचे नाव सुमता होते. त्यांना बालपणीच सिद्धी प्राप्त झाली होती. उत्तरेस जगन्नाथपुरी, काशी आणि बद्रिकेदार या तीर्थक्षेत्रांना भेटी दिल्यानंतर ते दक्षिणेस गोकर्ण महाबळेश्वर येथे गेले. नंतर ते श्रीशैलावर गेले. नंतर श्रीपाद श्रीवल्लभ कुरवपूर येथे राहिले. तेथेच आश्विन कृष्ण द्वादशीच्या दिवशी निजानंदी गमन केले. हा दिवस गुरुद्वादशी म्हणून दत्तसंप्रदायी लोक दरवर्षी श्रद्धेने पाळीत असतात.