नवी दिल्ली : देशात कोरोना व्हायरसचा प्रादुर्भाव मोठ्या प्रमाणात वाढला आहे. तो वाढू नये म्हणून देशभरात लॉकडाऊन करण्यात आलेले आहे. या काळात जवळपास १२ कोटी नोकऱ्या जाणार असल्याची भिती काँग्रेसच्या अंतरिम अध्यक्षा सोनिया गांधी यांनी व्यक्त केली आहे.

बातम्या ऐकण्यासाठी डाऊनलोड करा ई-सकाळचे ऍप

आता 3 मेपर्यंत लॉकडाऊन वाढवण्यात आला आहे. या लॉकडाऊनच्या पहिल्या टप्प्यात जवळपास अनेक उद्योगधंदे, व्यवसाय, कंपन्या बंद ठेवाव्या लागल्या आहेत. त्यामुळे लोकांसमोर पोट कसं भरायचा हा प्रश्न उभा राहिला आहे. अशा कुटुंबियांना केंद्र सरकारनं ७ हजार ५०० कोटी रुपयांची मदत द्यावी अशी मागणीही सोनिया गांधी यांनी केली आहे.

सोनिया गांधी म्हणाल्या, 'केंद्र सरकारनं अधिक गांभीर्यानं सर्व गोष्टी घेणं आवश्यक आहे. केवळ कामगारच नाही तर अनेक शेतकऱ्यांचं यामध्ये मोठं नुकसान झालं आहे. शेतकऱ्यांच्या मालाला हमीभाव मिळत नाही. आमच्याकडून आम्ही केंद्र सरकारसाठी अनेक उपाययोजना सुचवल्या होत्या. त्यामध्ये टेस्टिंग किट आणि टेस्टिंग क्षमता वाढवण्यात यावी. रँडम टेस्टिंग व्हावं. असे काही बदल सूचवण्यात आले होते. मात्र अद्यापही या केंद्र सरकारकडून या गोष्टींची कमतरता भासत आहे. दरम्यान, देशात आतापर्यंत (ता. २२) कोरोनाबाधितांची संख्या २० हजार ४७१ एवढी झाली आहे.