दुर्ग (छत्तीसगड) : छत्तीसगडमध्ये बसचा भीषण अपघात (Chhattisgarh Bus Accident) झाला आहे. येथील दुर्ग जिल्ह्यात मंगळवारी बस खाणीत पडून 12 जणांचा मृत्यू झाला, तर 30 हून अधिक प्रवासी जखमी झाले. पोलीस अधिकाऱ्यांनी ही माहिती दिली आहे.

अधिका-यांनी सांगितलं की, कुम्हारी पोलीस स्टेशन (Kumhari Police Station) हद्दीतील खापरी गावाजवळ असणाऱ्या मुरुमाच्या 50 फूट खोल खाणीत बस पडल्याने गाडीतून प्रवास करणाऱ्या बारा जणांचा मृत्यू झाला, तर 38 जण जखमी झाल्याची माहिती आहे.

पोलिसांनी दिलेल्या माहितीनुसार, घटनेची माहिती मिळताच पोलिसांचं पथक घटनास्थळी रवाना झालं असून बचावकार्य सुरू करण्यात आलं आहे. मृतदेह आणि जखमींना रुग्णालयात पाठवण्यात आलं असून बस खाणीतून बाहेर काढण्याचे प्रयत्न सुरू आहेत. दरम्यान, छत्तीसगडचे मुख्यमंत्री विष्णू देव साई यांनी या अपघातावर शोक व्यक्त केला आहे.