बंगळूर : शहरात दिवाळी सणादरम्यान (Diwali Festival) फटाके फोडताना खबरदारीच्या उपायांसाठी जनजागृती करण्यात आली असली तरी फटाक्यांमुळे १२० हून अधिक लोकांच्या डोळ्यांचे नुकसान झाले आणि १०० हून अधिक लोक जखमी झाले.

दरवर्षी फटाक्यांच्या (Firecrackers) अपघातामुळे डोळ्यांना जखमा होण्याच्या घटनांमध्ये वाढ होत आहे. यावेळी शहरातच २२० हून अधिक रुग्णांची नोंद झाली असून, उपचारासोबतच शस्त्रक्रिया करून घेणाऱ्यांची संख्या गेल्या वर्षीच्या तुलनेत अधिक आहे, ही बाब चिंतेची बाब आहे.

दिवाळी साजरी करताना तीन दिवसांपासून फटाक्यांच्या अपघातांच्या घटना घडल्या आहेत. शहरातील मिंटो, नारायण नेत्रालय, शेखर नेत्रालय यासह अनेक नेत्र रुग्णालयांमध्ये जखमींवर उपचार सुरू आहेत. अधिक जखमींवर व्हिक्टोरिया रुग्णालयात उपचार सुरू आहेत. फटाके वाजवणाऱ्यांपेक्षा शेजारी उभे राहणारे अधिक जखमी झाल्याचे आढळून आले आहे. शनिवारी मिंटो रुग्णालयात नऊ प्रकरणे नोंदवण्यात आली असून एकूण ४९ जणांवर उपचार करण्यात आले.

फटाक्यांच्या दुर्घटनेमुळे ३५ जणांवर उपचार करण्यात आले आहेत, तर १४ जणांवर अद्याप उपचार सुरू आहेत. ३२ मुलांच्या डोळ्यांना जखम झाली आहे. फटाक्यांमुळे २३ जण गंभीर जखमी आहेत. २६ जणांना किरकोळ दुखापत झाली असून ४ जणांवर यापूर्वीच शस्त्रक्रिया करण्यात आली आहे. आणखी दहा जणांना शस्त्रक्रियेची गरज आहे.

फटाके फोडताना २७ जण जखमी झाले तर जवळपास असलेल्या २२ जणांना फटाक्यांची धडक बसली. शनिवारी एकाच दिवसात २० फटाक्यांच्या अपघाताची नोंद करण्यात आली. यापैकी १५ मुले फटाक्यांमुळे जखमी झाली. नारायण नेत्रालयातही ६४ हून अधिक फटाक्यांच्या अपघाताची नोंद झाली आहे. फटाके फोडत असताना मुलाच्या डोळ्याला गंभीर दुखापत झाली असून त्याची दृष्टी जाण्याची भीती आहे. लहान मुले आणि प्रौढांसह २३ जणांना दाखल करण्यात आले असून त्यांच्यावर उपचार सुरू आहेत. यातील आठ मुलांच्या कॉर्नियाचे नुकसान झाले होते.

फटाका तपासण्यासाठी गेला अन्...

फटाके पाहणाऱ्या तीन वर्षांच्या मुलीला ठिणगी पडल्याने तिच्या कॉर्नियाला जखम झाली. एका दहा वर्षांच्या मुलाच्या डोळ्याला दुखापत झाली. तो मुलगा स्फोट न झालेला फटाका तपासण्यासाठी गेला होता. त्याचवेळी फटाक्याचा स्फोट झाला.