सीरियाच्या (Syria) उत्तर-पश्चिम भागात अमेरिकेच्या (America) स्पेशल ऑपरेशन्स टीमच्या सैनिकांनी केलेल्या हल्ल्यात काही लहान मुलांसह अनेक नागरिकांचा मृत्यू झाला आहे. स्थानिक रहिवासी आणि बंडखोर सैनिकांनी दिलेल्या माहितीनुसार इडलिब प्रांतातील तुर्कस्तानच्या सीमेजवळ रात्रभर चाललेल्या ऑपरेशनमध्ये सात मुलं आणि तीन महिलांसह किमान 12 लोक मारले गेले.

दाट लोकवस्तीच्या भागात हा हल्ला झाला. या भागात सीरियाच्या युद्धातून विस्थापित झालेले हजारो लोक छावण्यांमध्ये राहतात. अनेक रहिवाशांनी, भीतीमुळे नाव न छापण्याच्या अटीवर असोसिएटेड प्रेस या वृत्तसंस्थेशी बोलताना, नागरिकांच्या मृत्यूबद्दलची माहिती दिली. घटनास्थळी मृतांच्या अवयवांचा खच पडलेला असल्याचं त्यांनी सांगितलं.

जोरदार गोळीबार

पेंटागॉनचे प्रेस सेक्रेटरी जॉन किर्बी म्हणाले की, "यूएस सेंट्रल कमांडच्या नियंत्रणाखाली असलेल्या यूएस स्पेशल ऑपरेशन्स सैन्याने आज संध्याकाळी सीरियाच्या वायव्ये भागात दहशतवादविरोधी मोहीम राबवली." रॉयटर्स वृत्तसंस्थेच्या वृत्तानुसार संशयित अल कायदा-संबंधित दहशतवाद्याला लक्ष्य केलं गेलं होतं, मात्र त्या व्यक्तीच्या ओळखीबद्दल इतर कोणतीही माहिती नाही, तसंच या हल्ल्यात तो मारला गेला की नाही, याबद्दलही वृत्त नाही. रहिवाशांनी सांगितलं की त्यांनी कारवाईदरम्यान जोरदार गोळीबार झाल्याचं ऐकलं.