उन्नाव (उत्तर प्रदेश) : वातानुकूलित स्लिपर कोच बस आणि दुधाचा टँकर यांच्यात झालेल्या अपघातात १८ जण ठार तर १९ जण जखमी झाले. हा अपघात लखनौ-आग्रा महामार्गावर जोजिकोट गावाजवळ आज पहाटे पाचच्या सुमारास घडला. या अपघाताबद्दल राष्ट्रपती द्रौपदी मुर्मू, पंतप्रधान नरेंद्र मोदी, गृहमंत्री अमित शहा आणि मुख्यमंत्री योगी आदित्यनाथ यांनी शोक व्यक्त केला आहे. मृतांच्या नातेवाइकांना प्रत्येकी दोन लाख रुपये तर जखमींना ५० हजाराची मदत जाहीर केली आहे.

हा अपघात ओव्हरटेक करण्याच्या नादात झाल्याचे जिल्हाधिकारी गौरांग राठी यांनी सांगितले. तसेच बसमध्ये गरजेपेक्षा अधिक प्रवासी असल्याचेही बोलले जात आहे. या प्रकरणाची चौकशी सुरू केल्याचे ते म्हणाले. मृतांत चौदा पुरुष, तीन महिला आणि एका मुलाचा समावेश होता. या अपघातात दोन्ही वाहनांचे चालक जागीच ठार झाले. जखमींना तातडीने दवाखान्यात दाखल केले. घटनेच्या वेळी बहुतांश प्रवासी गाढ झोपेत होते. या अपघातात जखमी झालेले मोहंमद शामिम म्हणाले, प्रवासादरम्यान झोपेत होतो आणि अपघात कसा झाला, हे मी सांगू शकत नाही. अनेक प्रवाशांच्या डोक्याला जोरात मार लागला असून त्यांच्यावर उपचार सुरू असल्याचे त्यांनी सांगितले.

बिहारच्या शिवहर येथून दिल्लीकडे जाणारी महोबा जिल्ह्यातील ट्रॅव्हल कंपनीची स्लिपर बस पहाटे पाचच्या सुमारास बेहटा मुजावर पोलिस ठाण्याच्या हद्दीत जोजिकोट गावाजवळ पोचली. त्याचवेळी लखनौहून आग्राकडे जाणाऱ्या दुधाच्या टँकरने बसला ओव्हरटेक करण्याचा प्रयत्न केला. मात्र चालकाचा अंदाज चुकल्याने बसला जोरात धडक बसली. मात्र काहींच्या मते, बसने ओव्हरटेक केल्याने अपघात झाला. या धडकेमुळे टँकर वेगात उलटला. तसेच बसच्या चालकाकडील उजवा भाग कापला गेला आणि या बाजूला असलेल्या १८ जणांचा झोपेतच मृत्यू झाला. तर १९ जण जखमी झाले.

अपघातानंतर वाहतूक कोंडी

बस आणि टँकर रस्त्यावरच उलटल्याने आग्राकडे जाणारा मार्ग ठप्प झाला. दोन्ही बाजूंनी दोन किलोमीटरपर्यंत रांग लागली. उत्तर प्रदेश महामार्ग उद्योग विकास प्राधिकरणाच्या पथकाने दुभाजकासाठी असलेले कॉंक्रिट बोल्डर बाजूला काढले आणि एका बाजूने दुहेरी वाहतूक सुरू केली. त्यामुळे दोन ते तीन तास वाहतूक विस्कळित झाली होती. मृतांची ओळख पटली असून यात एकाच कुटुंबातील सहा जणांचा समावेश आहे. ट्रॅव्हल कंपनीच्या माध्यमातून आरक्षित तिकिटाच्या आधारावर मृतांची ओळख पटविण्यात आली.