नवी दिल्ली - भारतात गेल्या चार महिन्यांत कोरोनाशी संबंधित १८ हजार टन जैव वैद्यकीय कचरा निर्माण झाला असून यातील सर्वाधिक कचरा महाराष्ट्रात (३,५८७ टन) निर्माण झाल्याचे केंद्रीय प्रदूषण नियंत्रण मंडळाने (सीपीसीबी) दिलेल्या माहितीमधून स्पष्ट झाले आहे. 

ताज्या बातम्यांसाठी डाऊनलोड करा ई-सकाळचे ऍप

सर्व राज्ये आणि केंद्रशासित प्रदेशांकडून आलेल्या माहितीच्या आधारावर प्रदूषण नियंत्रण मंडळाने कोरोना कचऱ्याबाबत माहिती प्रसिद्ध केली आहे. देशात सप्टेंबर महिन्यात सर्वाधिक कोरोना कचरा निर्माण झाला. हा सर्व कचरा गोळा करून त्यावर देशातील १९८ जैव वैद्यकीय कचरा व्यवस्थापन केंद्रांमध्ये प्रक्रिया केली जात आहे. कोरोना कचऱ्यामध्ये वापरलेले पीपीई कीट, मास्क, बूटांवरील प्लास्टिकचे आवरण, हातमोजे याशिवाय उपचारांदरम्यान रक्त लागलेल्या वस्तू, मलमपट्टी, कापसाचे बोळे, रक्ताच्या पिशव्या, सुया इत्यादी अनेक वस्तूंचा समावेश आहे. देशात सर्वाधिक कचरा महाराष्ट्रात निर्माण झाला असून त्यानंतर तमिळनाडू, गुजरात, केरळ या राज्यांचा क्रमांक लागतो. 

देशभरातील बातम्या वाचण्यासाठी येथे ► क्लिक करा

कोरोना संसर्गास सुरवात झाल्यानंतर प्रदूषण मंडळाने मार्च महिन्यात कोरोना कचऱ्याच्या व्यवस्थापनाबाबत मार्गदर्शक तत्त्वे जारी केली होती. यानुसार, दवाखाने, कोविड केंद्रे, विलगीकरण कक्ष, नमुना गोळा करणारी केंद्रे, प्रयोगशाळा आणि इतर सार्वजनिक ठिकाणी कोरोनाशी संबंधित कचऱ्याच्या व्यवस्थापनासाठी सविस्तर सूचना देण्यात आल्या होत्या. निर्माण होणाऱ्या कचऱ्याच्या व्यवस्थापनासाठी कोविड१९ बीडब्लूएम हे मोबाईल ॲपही मंडळाने विकसीत केले आहे. याद्वारे जैववैद्यकीय कचऱ्यावरील प्रक्रियेवर देखरेख ठेवली जाते. निर्माण होणारा कचरा दररोज गोळा केला जावा आणि तो प्रक्रिया केंद्रांवर पाठवला जावा, यासाठी सर्वोच्च न्यायालयाने सर्व प्रदूषण मंडळांना आणि स्थानिक स्वराज्य संस्थांना या ॲपचा वापर करणे बंधनकारकही केले आहे. 

जगभरातील बातम्या वाचण्यासाठी येथे ► क्लिक करा

देशात निर्माण झालेला कोरोना कचरा 
१८००६ टन : जून ते सप्टेंबर 
५४९० टन : फक्त सप्टेंबर 

आघाडीवरील राज्ये (कचऱ्याचे आकडे टनांत) 
३५८७: महाराष्ट्र 
१७३७ : तमिळनाडू 
१६३८ : गुजरात 
१५१६ : केरळ 
१४३२ : उत्तर प्रदेश 
१४०० : दिल्ली 
१३८० : कर्नाटक 
१००० : पश्‍चिम बंगाल