नवी दिल्ली : भारतामधील अनेक महत्त्वाच्या कलाकृती आणि वस्तू इतिहासामध्ये चोरीला गेल्या आहेत. या साऱ्या वस्तू आता पुन्हा मिळवण्यासाठीची धडपड सातत्याने सुरु असते. आता भारताने ऑस्ट्रेलियातून अनेक शतके जुन्या असलेल्या तब्बल २९ कलाकृती परत मिळवल्या आहेत. या कलाकृती कोणे एके काळी भारतातून चोरील्या गेल्या होत्या. पंतप्रधान नरेंद्र मोदी (Narendra Modi) हे ऑस्ट्रेलियाचे पंतप्रधान स्कॉट मॉरिसन यांच्याशी व्हर्च्यूअली बैठक घेणार आहेत. त्याआधीच या वस्तू भारताला परत मिळाल्या असल्याचं अधिकाऱ्यांनी सांगितलं आहे.

PM मोदी आणि PM मॉरिसन आज व्हर्च्युअल बैठकीत भेटणार आहेत. या बैठकीमध्ये ते भारत आणि ऑस्ट्रेलिया यांच्यातील सर्वसमावेशक धोरणात्मक भागीदारी अंतर्गत विविध उपक्रमांतील प्रगतीचा आढावा घेणार आहेत. याबाबत माहिती देताना अधिकाऱ्यांनी सांगितलंय की, भारतातून काही शतकांपूर्वी चोरीला गेलेल्या मौल्यवान कलाकृतींना परत मिळवण्याची मोहिम सुरु असून या मोहिमेअंतर्गतच ऑस्ट्रेलियाकडून आपण या वस्तू पुन्हा प्राप्त केल्या आहेत. “ऑस्ट्रेलियाने या कलाकृती विकत घेतल्याचं अधिकाऱ्यांना कळताच ही प्रक्रिया सुरू झाली होती. या चोरी झालेल्या कलाकृती परत आणण्यासाठी जवळपास एक वर्ष लागले,” असं एका अधिकाऱ्याने सांगितले. या वस्तू गेल्या आठवड्यात भारतीय पुरातत्व सर्वेक्षण (ASI) ला प्राप्त झाल्या होत्या.

परत आलेल्या या कलावस्तूंमध्ये शिव भैरव, इ.स.च्या 9व्या - 10व्या शतकातील राजस्थानातील वाळूचे दगडी शिल्प, बाल-संत संबंदर, तामिळनाडूतील 12व्या शतकातील कांस्य पुतळा आणि 1830-40 मधील शिव आणि पार्वतीचे चित्र, कांगडा, हिमाचल प्रदेश येथील आहे. यातील काही कलाकृती ५३ वर्षांपूर्वी बेपत्ता झाल्या होत्या.

1972 पासून अशा एकूण 241 पुरातन वास्तू परत मिळवण्यात आल्या आहेत. यापैकी 228 गेल्या आठ वर्षांमध्ये मिळवण्यात आल्या आहेत. यूके, सिंगापूर, जर्मनी, कॅनडा, अमेरिका आणि ऑस्ट्रेलिया या देशांमधून यापैकी १५७ कलाकृतीतून परत आणण्यात आल्या आहेत. आणखी तीन कलाकृती इटली, ब्रिटन आणि ऑस्ट्रेलियामधून प्राप्त होणार असल्याचं भारतीय अधिका-यांनी सांगितलंय. त्या येत्या आठवड्यात देशाला मिळतील.