West Bengal : काही दिवसांपूर्वी महाराष्ट्रात एकनाथ शिंदे यांनी बंडखोरी करत मविआ सरकार अल्पमतात आणले होते. या बंडाची संपूर्ण देशाने दखल घेतली होती. यानंतर अखेर उद्धव ठाकरेंना मुख्यमंत्री पदाचा राजीनामा द्यावा लागला होता. याच धर्तीवर आता भाजप कोलकातमध्ये राजकीय भूकंप घडवण्याच्या तयारीत असल्याच्या चर्चांना उधाण आले आहे. कारण, भाजपचे नेते मिथुन चक्रवर्ती यांनी टीएमसीचे 38 पैकी 21 आमदार आमच्याशी थेट संपर्कात असल्याचे विधान केले आहे. कोलकाता येथील पक्ष कार्यालयात आयोजित पत्रकार परिषदेत मिथुन यांनी हा दावा केला आहे.

चक्रवर्ती म्हणाले की, तुम्हाला ब्रेकिंग न्यूज ऐकायची आहे का? या क्षणी, 38 टीएमसी आमदारांचे आमच्याशी चांगले संबंध आहेत, त्यापैकी 21 आमदार आमच्याशी थेट संपर्कात असल्याचा दावा केला आहे. याबाबत अधिक माहिती विचारली असता ते म्हणाला की, चित्रपटाच्या आधी संगीत आणि नंतर ट्रेलर रिलीज होतो. संगीत नुकतेच रिलीज झाले आहे. आता ट्रेलरची वाट पहा. भाजपला मुस्लीमविरोधी म्हणणे हे केवळ एक षडयंत्र आहे, प्रत्यक्षात तसे काहीही नसल्याचे स्पष्टीकरण दिले आहे.

मिथुन चक्रवर्ती यांनी गेल्या वर्षीच भारतीय जनता पक्षात प्रवेश केला होता. भाजपच्या मुस्लीमविरोधी प्रतिमेवर प्रश्न विचारला असता मिथुन म्हणाले की, भाजप दंगली घडवते असा नेहमीच आरोप केला जातो. पण मी स्पष्टपणे सांगतो की हा केवळ कटाचा एक भाग आहे.