कानपूर - येथील सरकारी बालिका संरक्षणगृहातील तब्बल 57 मुली कोरोना पॉझिटिव्ह आढळल्या असून, त्यातील पाचजणी गरोदर असल्याचा, तर एका मुलीला एड्‌स झाल्याचा धक्कादायक प्रकार उघडकीस आला आहे. त्यामुळे खळबळ उडाली आहे. 

एका मुलीला ताप आल्यामुळे गेल्या आठवड्यात रुग्णालयात दाखल करण्यात आले होते. तिची चाचणी पॉझिटिव्ह आल्यानंतर इतर मुलींच्या स्वॅबचे नमुने घेऊन तपासण्यात आले. एक कर्मचारीसुद्धा पॉझिटिव्ह आढळला आहे, पण संसर्गाचा स्त्रोत अद्याप स्पष्ट होऊ शकलेला नाही. बहुतांश मुलींना कोरोनाची लक्षणे नाहीत. त्यांना विलगीकरण केंद्रात हलविण्यात आले आहे. 

ताज्या बातम्यांसाठी डाऊनलोड करा ई-सकाळचे ऍप 

सूत्रांनी दिलेल्या माहितीनुसार 15 जून रोजी पहिल्या रुग्णाची नोंद झाल्यानंतर प्रशासनाने इमारत सील केली नाही. शंभर मुलींची क्षमता असताना त्यात तब्बल 171 मुलींना ठेवण्यात आले होते. त्यामुळे दोन दिवसांनी आणखी 33 जणी, तर 19 तारखेला 16 जणी कोरोना पॉझिटिव्ह झाल्या. त्यानंतर अखेर इमारत सील करण्यात आली. 

महिला आयोगाचा आरोप 

दरम्यान, अनेक मुली लैंगिक शोषणाला बळी पडल्या असल्याचा आरोप राज्य महिला आयोगातर्फे करण्यात आला आहे. पोलिस अधिकारी दिनेश कुमार यांनी मात्र केंद्रात कोणताही गैरप्रकार घडला नसल्याचे सांगितले. गरोदर राहिलेल्या पाच मुली विविध जिल्हा केंद्रांतून इथे आणण्यात आल्या होत्या. त्या गरोदर कशामुळे राहिल्या, याची चौकशी सुरू आहे, असेही त्यांनी नमूद केले. 

पुण्याच्या बातम्या वाचण्यासाठी येथे  क्लिक करा

कानपूरचे पोलिस आयुक्त सुधीर महादेव यांनी सांगितले की, एका मुलीला एड्‌स झाल्याप्रकरणी बालिकागृह अधिकाऱ्यांची चौकशी केली जाईल.