नवी दिल्ली : महाराष्ट्रात सध्या पुरानं थैमान घातलं आहे. यामध्ये मोठ्या प्रमाणात आर्थिक तसेच जीवित हानी झाली आहे. या पार्श्वभूमीवर केंद्र सरकाने आता मदत जाहीर केली आहे. महाराष्ट्रातील पूरग्रस्त शेतकऱ्यांसाठी ही मदत असणार आहे. कृषिमंत्री नरेंद्रसिंग तोमर यांनी लोकसभेत एका प्रश्नाला उत्तर देताना आज मंगळवारी राज्यातील शेतकऱ्यांसाठी ही मदत जाहीर केली आहे. केंद्र सरकारने महाराष्ट्रातील पूरग्रस्त शेतकऱ्यांसाठी जवळपास ७०० कोटी मंजूर केले असल्याची माहिती दिली आहे. याबाबतचं वृत्त 'हिंदूस्थाना टाईम्स'ने दिले आहे.

संसदेच्या पावसाळी अधिवेशनाच्या पाचव्या दिवशी देखील विरोधी पक्षाने सभागृहात गोंधळ घातल्यामुळे कामकाज स्थगित करावं लागलं. सभापती ओम बिर्ला यांनी विरोधकांना वारंवार कार्यवाहीत सहभागी होण्याचं आवाहन केलं मात्र, प्रश्नोत्तराचा तास खूप वेळा तहकूब करावा लागला. त्यानंतर दुपारी ४ वाजता सभागृहाचं कामकाज सुरु करण्यात आलं.

या सगळ्या गोंधळाच्या परिस्थितीमध्येच केंद्रीय कृषीमंत्री नरेंद्रसिंह तोमर यांनी महाराष्ट्रात सध्या आलेल्या पुराबद्दल वक्तव्य केलं. त्यांनी म्हटलं की, नुकत्याच आलेल्या पूरामुळे, विशेषत: शेतकऱ्यांच्या झालेल्या नुकसानीचा सखोल अहवाल आम्हाला मिळाला आणि त्याचं विश्लेषण केलं गेलंय. यानंतर या पूरामधील पीडित शेतकऱ्यांसाठी गृह मंत्रालयाने ७०० कोटीं रुपये मदत म्हणून मंजूर केले आहेत, ” अशी माहिती तोमर यांनी दिली.