नवी दिल्ली : सीडीएस जनरल बिपीन रावत (Bipin rawat, Indian military chief), त्यांची पत्नी मधुलिका रावत आणि इतर 11 अधिकाऱ्यांचा काल एका हेलिकॉप्टर दुर्घटनेमध्ये मृत्यू झाला आहे. या दुर्घटनेनंतर संपूर्ण देशात हळहळ व्यक्त केली जात आहे. दरम्यान या 13 जणांच्या पार्थिवांना घेऊन जाणाऱ्या रुग्णवाहिकेचा देखील किरकोळ अपघात झालेला पहायला मिळाला आहे. आज गुरुवारी सकाळीच पार्थिवांना वेलिंगटनमधून मद्रास रेजिमेंटल सेंटरकडे नेण्यात येत होतं. रेजिमेंटल सेंटरमधून त्यांच्या पार्थिवांना सुलूर एअरबेसकडे नेण्यात येणार होतं. मात्र, या ताफ्यातील एका रुग्णवाहिकेचे संतुलन बिघडलं आणि ती अनियंत्रित होऊन एका लहानच्या टेकडीला जाऊन धडकली. याबाबतचं वृत्त 'नवभारत टाईम्स'ने दिलं आहे.

मिळालेल्या माहितीनुसार, हा अपघात किरकोळ स्वरुपाचा होता. फार मोठी धडक घडली नाही, त्यामुळे त्यामध्ये कोणतीही जीवितहानी झालेली नाहीये. ही दुर्घटना मद्रास रेजिमेंटल सेंटरमधून सुलूर एअरबेसच्या दरम्यानच्या रस्त्यामध्ये मेट्टूपलयमजवळ झाला आहे. या पार्थिवांना सुलूर एअरबेसमधून आज सायंकाळपर्यंत दिल्लीकडे एअरलिफ्ट करण्यात येईल.