हैदराबाद : हैदराबादमधील भारतीय महसूल सेवा (आयआरएस)एका महिला अधिकाऱ्याने तिचे नाव आणि लिंग बदलले असून केंद्रीय अर्थ मंत्रालयानेही त्यास मंजुरी दिली आहे. वरिष्ठ ‘आयआरएस’ अधिकारी असलेल्या एम. अनुसूया (वय ३५) यांनी त्यांच्या नावात आणि लिंगात बदल केला आहे.

महिलेतून पुरुषात असा लिंग बदल आणि एम. अनुसूया हे नाव बदलून एम. अनुकथीर सूर्या असा बदल करण्यासाठी त्यांनी विनंती केली होती. केंद्राने ही विनंती मान्य केली आहे.भारतीय महसूल सेवेत लिंगबदलाची ही पहिलीच घटना आहे. एम. अनुसूया या सध्या हैदराबाद येथील सीमाशुल्क उत्पादन आणि सेवा कर अपीलीय न्यायाधिकरणाच्या मुख्य आयुक्त कार्यालयात सहआयुक्त आहेत.

केंद्रीय अर्थ मंत्रालय, महसूल विभागाच्या (केंद्रीय अप्रत्यक्ष कर आणि सीमाशुल्क मंडळ) अवर सचिवांनी त्यांची विनंती मान्य केली आहे. ‘अनुसूया यांची विनंती मान्य करण्यात आली आहे आणि येथून पुढे सर्व अधिकृत नोंदीत या अधिकाऱ्याची ओळख श्री एम. अनुकथीर सूर्या अशी असेल.