औरंगाबाद - माजी राष्ट्रपती तथा शास्त्रज्ञ एपीजे अब्दुल कलाम यांचा आज जन्मदिन वाचन प्रेरणा दिन म्हणून साजरा केला जात आहे. ते भारताचे ११ वे राष्ट्रपती होते. त्यांचा जन्म तमिळनाडूतील (Vachan prerna diwas) रामेश्वरम येथे १५ ऑक्टोबर १९३१ रोजी झाला होता. मुलांने कलेक्टर व्हावे अशी इच्छा कलामांच्या वडिलांची होती. याबाबत ते 'अग्निपंख' या (राजहंस प्रकाशन) आपल्या आत्मचरित्राच्या प्रस्तावनेत म्हणतात, की माझ्या इच्छेप्रमाणे मी पायलट बनू शकलो नाही किंवा वडिलांच्या इच्छेनुसार कलेक्टर न बनता मी राॅकेट अभियंता बनलो, हे सांगणे मला महत्त्वाचे, संयुक्तिक वाटते. अब्दुल कलाम यांच्या केंद्रस्थानी भारतातला तरुण वर्ग होता. त्यांच्या सार्वजनिक कार्यक्रमात मोठ्या संख्येने सर्व वयोगटातील लोक उपस्थित असतं. कलामांवर जलालुद्दीन आणि शमसुद्दीन या दोघांचा प्रभाव होता. मला जो जलालुद्दीन आणि शमसुद्दीन यांचा निकट सहवास घडला, त्याने मी स्वतंत्र, वेगळा असा बनत गेलो. मोठेपणी मी त्या सर्वांपेक्षा वेगळा झालो, याची बीजे त्या दोघांच्या सहवासामुळे जो परिणाम झाला त्यामध्ये आहेत. (Abdul kalam birth anniversary)

शाळेत शिकायला न मिळणारे उपजत शहाणपण मी जलालुद्दीनकडून शिकलो, तर शमसुद्दीनकडून मी चेहऱ्यावरुन दुसऱ्याच्या मनातले ओळखायला शिकलो, शरीराची, डोळ्यांची भाषा शिकलो. माझ्यामध्ये जो सर्जनशीलतेचा स्त्रोत उगम पावत, फुलत, खळाळत गेला; त्याचे श्रेय मी निःसंशय त्या दोघांच्या सहवासाच्या माझ्यावर पडलेल्या प्रभावाला देतो, असे अब्दुल कलाम यांनी 'अग्निपंख'मध्ये सांगितले आहे. कलामांना 'लोकांचा राष्ट्रपती' म्हणून संबोधले जाते. त्यांना १९९७ मध्ये भारतातील सर्वोच्च असे भारतरत्न पुरस्कार देऊन सन्मानित करण्यात आले होते.