नवी दिल्ली : विंग कमांडर अभिनंदन वर्धमान यांच्याकडून आज तपास संस्थांनी पाकिस्तानमधील घटनांबाबत सविस्तर माहिती (डिब्रिफिंग) घेतली. हवाई दलाच्या वरिष्ठ अधिकाऱ्यांनीही अभिनंदन यांची भेट घेतली.

पाकिस्तानातून परत आल्यानंतर अभिनंदन यांच्या कालपासून (ता. 2) दिल्लीतील लष्करी रुग्णालयात वैद्यकीय चाचण्या सुरू आहेत. या चाचण्यांदरम्यान त्यांच्या शरीर आणि मनावरील ताण कमी करण्याचा प्रयत्न केला जात आहे. तसेच, ते पाकिस्तानमध्ये असताना अभिनंदन यांना सामोरे जाव्या लागलेल्या घटनांबाबत सविस्तर माहिती तपास संस्था त्यांच्याकडून घेत आहेत. वैमानिक अभिनंदन हे पुन्हा लवकरच विमान उड्डाणास सज्ज होतील, असे लष्कराच्या अधिकाऱ्यांनी सांगितले.

पाकिस्तानी जेट विमानांबरोबरील हवाई युद्धात अभिनंदन यांचे मिग-21 विमान पडले होते. त्याआधी त्यांनी पाकिस्तानच्या एफ-16 विमानाला पाडले होते. जवळपास तीन दिवस पाकिस्तानच्या ताब्यात राहिल्यानंतर अभिनंदन यांना पाकिस्तानने भारताकडे सोपविले होते. या तीन दिवसांत आपला मानसिक छळ झाल्याचे अभिनंदन यांनी सांगितले होते.