नवी दिल्ली : महाराष्ट्रातील वादग्रस्त प्रशिक्षणार्थी आयएएस अधिकारी पूजा खेडकरनंतर आता आणखी एक अधिकारी अभिषेक सिंह वादात सापडले आहेत. अभिषेक सिंह यांनी बनावट प्रमाणपत्र सादर करत आयएएसची नोकरी मिळविल्याचा आरोप केला जात आहे. त्यांची दिव्यांगांच्या कोट्यातून केंद्रीय लोकसेवा आयोगाकडून निवड करण्यात आल्याचे बोलले जात आहे. अभिषेक २०११ च्या बॅचचे आयएएस अधिकारी असले तरी त्यांनी ऑक्टोबर २०२३ मध्ये पदाचा राजीनामा दिलेला आहे.

्अभिषेक सिंह यांनी केंद्रीय लोकसेवा आयोगाची दिव्यांग श्रेणीतून परीक्षा उत्तीर्ण केली होती. त्यांनी लोकोमोटिव्ह डिसऑर्डर म्हणजेच स्वत:हून चालण्यास फिरण्यास सक्षम नसल्याचे म्हटले होते. मागच्या वर्षी अभिषेक यांनी कला क्षेत्रात करियर करण्यासाठी आयएएस पदाचा राजीनामा दिला. अभिषेक यांचे जिम वर्कआऊट आणि नृत्याचे व्हिडिओ सोशल मीडियावर व्हायरल होत आहेत. त्यामुळे दिव्यांग श्रेणीतील त्यांच्या निवडीवर आक्षेप घेतले जात आहेत.

मात्र आपल्याविरुद्ध खोटा प्रचार सुरू असल्याचा दावा अभिषेक सिंह यांनी केला आहे. सोशल मीडिया प्लॅटफॉर्म ‘एक्स’वर अनेक युजर्सनी पीडब्लूबीडी-३ (पर्सन विथ बेंचमार्क डिसेबिलिटी) च्या श्रेणीतील निकषाचा संदर्भ देत त्यांच्या पात्रतेवर प्रश्‍न उपस्थित केले आहेत. यात सेरेब्रल पाल्सी, कुष्टरोगाने बरे झालेला उमेदवार, बुटकेपणा, ॲसिड ॲटक पीडित, मस्कुलर डिस्ट्रॉफी आणि चालण्यात अडथळे येणे यासारख्या आजारांचा या श्रेणीत समावेश आहे.

नृत्य करणारे अभिषेक यांनी लोकोमोटर डिसॲबिलिटी श्रेणीनुसार यूपीएससी परीक्षा उत्तीर्ण केली होती. अभिषेक सिंह यांनी या आरोपावर उत्तर देताना एक्सवर म्हटले, मला या आरोपाने काही फरक पडत नाही. मी आयुष्यात पहिल्यांदाच आरोपांना उत्तर देत आहेत. माझे वडील आयपीएस अधिकारी असल्याने मला फायदा मिळाला होता. माझे वडील अत्यंत गरिबीतून पीपीएस अधिकारी झाले आणि नंतर आयपीएसवर बढती मिळाली. आमच्या संपूर्ण कुटुंबात मी एकमेव आयएएस अधिकारी म्हणून निवडलो गेलो, असे ते म्हणाले. माझ्याविरुद्धचा बनावट प्रचार थांबवावा, असे आवाहन केले.