हरियाणाच्या (Haryana) गुरूग्रामध्ये (Gurugram) गेल्या काही दिवसांपासून हिंदू आणि मुस्लीम धर्मियांमध्ये तणाव निर्माण झाला आहे. शहरातील काही मोकळ्या ठिकाणी मुस्लीम समाजाकडून नमाज (Namaz) पठण करणाऱ्या मुस्लीम धर्मियांच्याविरोधात काही हिंदू संघटनांकडून निदर्शनं केली गेली. काही काळ संघर्ष निर्माण झाल्यानंतर त्या ठिकाणी पोलीस बंदोबस्त वाढवण्यात आला होता. त्यातच आता हरियाणाचे मुख्यमंत्री मनोहरलाल खट्टर यांनी देखील या प्रकरणावर प्रतिक्रिया दिली असून, हे सहन केलं जाणार नाही असं सांगितलं आहे.

गुरूग्राममध्ये सुरू असणाऱ्या या वादामुळे गेल्या काही दिवसांपासून शहरातील वातावरणात तणाव निर्माण झाला आहे. त्यातच काल मुख्यमंत्री मनोहरलाल खट्टर हे एका बैठकीसाठी शहरात आले असता काही संघटनांनी त्यांच्याकडे ही मागणी केली. त्यानंतर मुख्यमंत्री खट्टर यांनी यावर बोलताना सांगितलं की, उघड्यावर नमाज पठण करण्याची ही पद्धत अजिबात सहन केली जाणार नाही. यावर एकत्र बसून लवकरात लवकर तोडगा काढावा अशी कठोर भूमिका खट्टर यांनी घेतली आहे.

दरम्यान, खट्टर यांनी माध्यमांशी बोलताना सांगितले की, पोलीस आणि प्रशासनाने देखील हा वाद सोडवावा लागणार असल्याचं मत व्यक्त केलं आहे.