अमेठी : केंद्रीय महिला आणि बालविकास मंत्री स्मृती इराणी (Smriti Irani) यांनी काँग्रेसचे माजी अध्यक्ष राहुल गांधी (Rahul Gandhi) यांची खिल्ली उडवत गुलाम नबी आझाद (Ghulam Nabi Azad) आता 'आझाद' झालेत; पण अमेठी (Amethi) फार पूर्वीपासून 'आझाद' झालीय, अशी टीका त्यांनी काँग्रेसवर केलीय.

आपल्या संसदीय मतदारसंघाच्या दौऱ्यावर असलेल्या स्मृती इराणी यांनी शनिवारी रात्री माध्यमांशी संवाद साधला. यावेळी त्या म्हणाल्या, गुलाम नबी आझाद यांनी नुकतेच काँग्रेस पक्षाला सोडचिठ्ठी दिलीय. काँग्रेसवाले आता त्यांच्याच नेतृत्वावर भाष्य करत आहेत. त्यामुळं मला वेगळं काही बोलण्याची गरज वाटत नाही, असं त्यांनी स्पष्ट केलं.

सुखी बाजगढ अमृत सरोवरच्या उद्घाटनानंतर प्रसारमाध्यमांनी विचारलेल्या प्रश्नाला उत्तर देताना स्मृती म्हणाल्या, काँग्रेस नेतृत्व ज्याप्रकारे आपल्याच पक्षाबद्दल, विशेषत: गांधी घराण्याबद्दल टीका करत आहे. त्यावर मला भाष्य करण्याची गरज नाहीय. मला एवढंच म्हणायचाय की, गुलाम साहेब नुकतेच 'आझाद' झाले आहेत. पण, 3 वर्षांपूर्वी अमेठीही स्वतंत्र झालीय. यावेळी इराणींनी कुपोषणमुक्त अमेठीचा नारा दिला.

विशेष म्हणजे, 2019 च्या लोकसभा निवडणुकीत भारतीय जनता पक्षाच्या नेत्या इराणी यांनी अमेठी लोकसभा मतदारसंघातून (Amethi Lok Sabha Constituency) राहुल गांधींचा पराभव केला होता. अमेठी ही गांधी घराण्याची पारंपरिक जागा असून त्याचं प्रतिनिधित्व संजय गांधी, राजीव गांधी, सोनिया गांधी आणि राहुल गांधी यांनी केलंय.