नवी दिल्ली- उत्तर प्रदेशच्या आग्रामधील एक व्हिडिओ सोशल मीडियावर मोठ्या प्रमाणात व्हायरल ( viral Video) होत आहे. पूर्व-माध्यमिक शाळेतील एका मुख्याध्यापिकीने उशिरा आल्याच्या कारणावरुन शिक्षिकेला मारहाण केली आहे. आग्राच्या सिगाना गावातील ही घटना आहे. एका इंग्रजी वृत्तसंस्थेने यासंर्भातील बातमी दिली आहे.

मुख्याध्यापिकीने महिला शिक्षिका गुंजन चौधरी हिला मारहाण केली, तसेच तिचे कपडे फाडण्याचा प्रयत्न केल्याचा आरोप आहे. मुख्याध्यापिका आणि शिक्षिकेच्या मारहाणीचा व्हिडिओ सोशल मीडियावर व्हायरल होत आहे. मुख्याध्यापिका शिक्षिकेला मारहाण करत असल्याचं दिसत आहे. तसेच शिक्षिकेचा कुर्ता ओढत असल्याचं व्हिडिओमध्ये दिसत आहे.

सदर घटनेचा व्हिडिओ एकाने शूट केला आहे. व्हिडिओमध्ये आवाज येत आहे की, 'हे सर्व शूट केलं जात आहे. मॅडम तुम्ही खूप वाईट वागत आहात. तुम्हाला हे शोभत नाही.' घटनेमध्ये शिक्षिका जखमी झाली आहे, असा दावा इतर शिक्षिकांनी केला आहे. (Principal Thrashes Teacher)

व्हिडिओमध्ये मुख्याध्यापकिचा ड्रायव्हर देखील दिसून येत आहे. तो भांडण सोडवण्याचा प्रयत्न करतो. पण, मुख्याध्यापिका मारहाण सुरुच ठेवत असल्याचं दिसतंय. तसेच शिक्षिका आणि मुख्याध्यापिका यांच्यामध्ये शा‍ब्दिक चकमक देखील पाहायला मिळते. मिळालेल्या माहितीनुसार, मुख्याध्यापिकेने जखमी शिक्षिकेविरोधात एफआयआर दाखल केला आहे. पोलीस याप्रकरणी तपास करत आहेत.

दरम्यान, शाळेच्या वर्गातच ही घटना घडली असल्याने लोक यावर संतप्त प्रतिक्रिया देत आहेत. शाळेतील मुख्याध्यापक आणि शिक्षिकाच असं वर्तन करत असतील तर विद्यार्थ्यांवर काय परिणाम पडेल. विद्यार्थी यातून काय शिकवण घेतील. व्हिडिओमध्ये काही विद्यार्थीपण दिसत आहेत. जबाबदार व्यक्तींनी किमान शाळेच्या आवारात तरी चांगली वागणूक ठेवावी अशी अपेक्षा लोकांनी व्यक्त केली आहे.