नवी दिल्ली : समाजवादी पक्षाचे गाजिपूरचा खासदार अफजल अन्सारी यांची खासदारकी वाचली आहे. अलाहाबाद हायकोर्टानं त्यांना मोठा दिलासा देताना त्यांना PMLA कोर्टानं सुनावलेली चार वर्षांची शिक्षा रद्द केली. हायकोर्टानं या प्रकरणी निकाल राखून ठेवला होता तो आज जाहीर केला.

अफझल अन्सारी यांना विषेश पीएमएलए कोर्टानं गँगस्टर अॅक्ट अंतर्गत दाखल झालेल्या गुन्ह्यांतर्गत चार वर्षांची शिक्षा सुनावली होती. या निकालाविरोधात अन्सारीनं हायकोर्टात धाव घेत आपली शिक्षा रद्द व्हावी, यासाठी याचिका दाखल केली होती. दुसरीकडं राज्य सरकारनं आणि कृष्णानंद राय यांचे पुत्र पियुष कुमार राय यांनी हायकोर्टात त्यांच्या शिक्षेत वाढ करण्याची मागणी करण्याची याचिका दाखल केली होती.

२०२३ मध्ये गाझिपूरच्या कोर्टानं खासदार अफझल अन्सारी यांना अपहरण आणि कृष्णानंद राय यांच्या हत्या प्रकरणात चार वर्षांच्या कारावासाची शिक्षा सुनावली होती. तसंच १ लाख रुपयांचा दंडही ठोठावला होता.

दरम्यान, तुरुंगात असताना अन्सारी यांनी समाजवादी पक्षाच्या तिकीटावर गाझिपूर लोकसभा मतदारसंघातून २०२४ मध्ये पुन्हा निवडणूक लढवली आणि ते जिंकून आले आहेत. भाजपच्या पारसनाथ आणि बसपाच्या उमेश कुमार सिंह यांच्याविरोधात ते १,२४,८६१ मतांनी निवडून आले. अफझल अन्सारी हे गोळीबारात ठार झालेला गँगस्टर आणि राजकारणी मुख्तार अन्सारीचे भाऊ आहेत.