राहुल गांधी यांचं सदस्यत्व रद्द झाल्यानंतर गृहमंत्री अमित शाह यांनी यावर भाष्य केलं आहे. यावेळी बोलताना त्यांनी काँग्रेसवर गंभीर आरोप केले असून काँग्रेसने केंद्रीय एजन्सीचा कसा गैरवापर केला, एका खोट्या गुन्हात नरेंद्र मोदींना अडकवण्याचा कसा डाव होता याबाबतही अमित शाह यांनी गौप्यस्फोट केला आहे.

केंद्रीय गृहमंत्री अमित शहा यांनी एका कार्यक्रमात बोलताना सांगितले की, तपास एजन्सी त्यांची चौकशी करत असताना सीबीआय पंतप्रधान नरेंद्र मोदी यांना गुजरातमधील एका कथित बनावट चकमक प्रकरणात अडकवण्यासाठी अमित शाह यांच्यावर दबाव आणण्याचा प्रयत्न करत होते. त्यावेळी काँग्रेसच्या नेतृत्वाखालील यूपीए सरकारच्या काळातील ही घटना असल्याचंही त्यांनी यावेळी सांगितलं आहे.

एकीकडे देशात केंद्रीय यंत्रणाचा वापर विरोधी पक्षातील नेत्यांना अडकवण्यासाठी प्रयत्न केले जात असल्याचा आरोप होत असतानाच नरेंद्र मोदी सरकार त्यांना अडकवण्यासाठी केंद्रीय यंत्रणाचा “दुरुपयोग” करत होता असा गंभीर आरोप गृहमंत्री अमित शाह यांनी ‘न्यूज 18 रायझिंग इंडिया’ या कार्यक्रमात बोलताना केला आहे. यावेळी अमित शाह यांनी विरोधक कोणत्या थराला जाऊन हे सगळं करत होते याबद्दलदेखील भाष्य केलं आहे.

काँग्रेस सरकारच्या काळात कथित बनावट चकमक प्रकरणात नरेंद्र मोदी यांना अडकवण्यासाठी सीबीआय माझ्यावर दबाव आणत होती असा आरोप त्यांनी केला. त्यावेळी ते गुजरातचे मुख्यमंत्री होते. तुम्ही टेन्शन घेऊन नका तुम्ही नरेंद्र मोदींचं नाव सांगून टाका असं त्यावेळी मला सांगण्यात आलं होतं. त्यासाठी माझ्यावर दबाव आणला जात होता असं अमित शाह यावेळी म्हणाले.

तर पुढे बोलताना अमित शाह म्हणाले की, राहुल गांधींनी अजूनही या निकालाला आव्हान दिलेलं नाही, त्यांच्यात कोणता अहंकार आहे? लालू प्रसाद यादव, जयललिता, राशिद अल्वी यांच्यासह 17 जणांची खासदारकी गेली. पण कुणीही काळे कपडे घातले नाहीत. सुप्रीम कोर्टाचा निर्णय आहे. देशाच्या एका व्यक्तीसाठी कायदा बदलायचा का? असा सवाल अमित शाह यांनी केला आहे.