नवी दिल्ली : केंद्र सरकारच्या संरक्षण विषयक कॅबिनेट कमिटीनं आज (मंगळवार) एक ऐतिहासिक निर्णय घेतला. त्यानुसार 'अग्निपथ' नामक योजनेची घोषणा करण्यात आली असून याद्वारे तरुणांना भारतीय सैन्य दलांमध्ये सामिल होण्याची संधी मिळणार आहे. संरक्षण मंत्री राजनाथ सिंह यांनी याबाबत पत्रकार परिषदेत ही घोषणा केली. यावेळी तिन्ही दलांचे प्रमुखही उपस्थित होते. (announcing a special Agneepath scheme for army recruitment for Indian youth)

राजनाथ सिंह म्हणाले, "या अग्निपथ योजनेच्या लाभार्थी तरुणांना 'अग्निवीर' हा किताब मिळणार आहे. या अग्नीवीरांना चांगल्या पगाराची संधी उपलब्ध होणार आहे. त्याचबरोबर ४ वर्षांच्या सेवेनंतर निवृत्तीवेतनही मिळणार आहे. या योजनेअंतर्गत सैन्य दलांचं स्वरुप अधिक तरुण करण्यासाठी प्रयत्न होत आहेत. याद्वारे तरुणांना नव्या तंत्रज्ञानानं प्रशिक्षित करणं त्याचबरोबर त्यांच्या आरोग्याची पातळी उंचावण्यासाठी प्रयत्न केले जाणार आहेत. या योजनेमुळं विविध क्षेत्रात नव्या स्कील्ससह रोजगाराच्या संधी उपलब्ध होणार आहेत"

या योजनेबाबत अधिक माहिती देताना लेफ्ट. जन. अनिल पुरी म्हणाले, "अग्निवीर हे भविष्यात तयार सैन्यबळाचा भाग असतील. अग्निवीर हे भारताचे तरुण संरक्षक असतील. आमच्यासोबत चार वर्षे काम केल्यानंतर अग्निवीरांचा बायोडेटा हा विशेष असेल. अनेकांच्या गर्दीमध्ये ते अग्निवीर म्हणून आपला खास अॅटिट्यूड असेल. सध्या या योजनेत सामिल होण्याचं सरासरी वय ३२ वर्षे असेल पुढील सहा-सात वर्षानंतर ते २६ पर्यंत खाली येईल. भारतीय सैन्य दलांना तरुण, टेक्नोसॅव्ही, आधुनिक भविष्यातील तयार सैन्यबळाद्वारे मोठा बदल करण्यात येणार आहे"