नवी दिल्ली : आज केंद्रीय आरोग्य मंत्रालयाने कोरोना परिस्थितीबाबत पत्रकार परिषद घेतली आहे. त्यांनी दिलेल्या माहितीनुसार, केरळ, महाराष्ट्र, तमिळनाडू आणि कर्नाटका या चार राज्यांमध्ये 50 हजारांहून अधिक ऍक्टीव्ह केसेस सध्या आहेत. तर 11 राज्यांमध्ये 10 हजार ते 50 हजारच्या दरम्यान रुग्ण आहेत, अशी माहिती आरोग्य मंत्रालयाचे सहसचिव लव अग्रवाल यांनी दिली आहे. तसेच पुण्यात आता आणखी एक लस विकसित केली जात असल्याचीही माहिती त्यांनी दिली आहे. (Corona Vaccine in Pune)

जगाला या कोरोना विषाणूबद्दल सर्वकाही माहिती नाहीये. त्यामुळे त्याचं निरीक्षण आणि त्याबाबतची दक्षता घेणे सुरुच राहील, असं नीती आयोगाचे सदस्य व्ही के पॉल यांनी म्हटलं आहे. पुढे त्यांनी म्हटलंय की, एकूणात कोरोनाची परिस्थिती ही आशादायक आहे. मात्र, काही राज्ये जसं की, केरळ, मिझोराम, हिमाचल प्रदेश यांमध्ये मोठ्या संख्येने रुग्ण सापडत आहेत. त्यामुळे आपण आपली शस्त्रे खाली टाकू शकत नाही. 24 जानेवारी रोजी दैनंदिन पॉझिटीव्हीटी रेट हा 20.75 टक्के होता जो आता 4.44 टक्क्यांवर आला आहे. कोरोना संसर्गाचा वेग मंदावला असल्याचंच यातून दिसून येतंय, असंही त्यांनी म्हटलंय.

भारतातील पहिली देशी मेसेंजर RNA (mRNA) कोरोना लस पुण्यामधील जेनोव्हा बायोफार्मास्युटिकल्सद्वारे विकसित केली जात आहे. सध्या ती अंतिम टप्प्यातील चाचण्यांमधून जात असून लवकरच आपण वापरु शकू, अशी आशा आहे.

आपण या विषाणूमुळे खूप काही शिकू शकलो आहे. मात्र, या विषाणूबाबत सगळंच काही जगाला माहिती नाहीये. या विषाणूसोबत लढण्यासाठी जगाने एकसंधच रहायला हवं तसेच आपल्या हाती असलेल्या संसाधनांचा वापर आपण करतच राहिला पाहिजे, असंही आरोग्य विभागाने स्पष्ट केलंय.