नवी दिल्ली : सावरकरांवर केलेल्या वक्तव्यावरून काँग्रेस नेते राहुल गांधी हे गेल्या अनेक दिवसांपासून भाजपच्या निशाण्यावर आहेत. आता केंद्रीय मंत्री अनुराग ठाकूर यांनी रविवारी म्हटलं की, राहुल गांधी यांनी 10 जन्म घेतले तरी ते सावरकरांसारखे बनू शकत नाही.

राहुल यांनी लोकसभेतून अपात्र ठरविण्यात आले. त्यानंतर त्यांनी 25 मार्च रोजी "माझे नाव सावरकर नाही, माझे नाव गांधी आहे. गांधी कोणाची माफी मागत नाहीत, असं म्हटलं होतं.

राष्ट्रीय राजधानीतील जवाहरलाल नेहरू स्टेडियमवर जीतो अहिंसा रनमध्ये एएनआयशी बोलताना अनुराग ठाकूर म्हणाले की, सावरकरांचा अपमान केल्याबद्दल देश राहुल गांधींना कधीही माफ करणार नाही. राहुल गांधींनी 10 जन्म घेतले तरी ते सावरकर होऊ शकत नाहीत. याआधी 28 मार्च रोजी महाराष्ट्राचे माजी मुख्यमंत्री उद्धव ठाकरे यांनी काँग्रेस नेते राहुल गांधी यांना सावरकरांवर टीका न करण्याचा इशारा दिला होता.

महाराष्ट्राचे विद्यमान मुख्यमंत्री एकनाथ शिंदे यांनी राहुल गांधींवर निशाणा साधला होता, जर त्यांना शक्य असेल तर त्यांनी सावरकरांप्रमाणेच अंदमान तुरुंगात राहावे.