नवी दिल्ली : सध्या तिहार तुरुंगात कैद असलेले दिल्लीचे मुख्यमंत्री अरविंद केजरीवाल यांच्या शरीरातील साखरेचे प्रमाण कमी होत असल्याने ते कोमात जाण्याची शक्यता असल्याचा दावा ‘आप’चे खासदार संजयसिंह यांनी केला आहे. भाजपने मात्र या आरोपांचा इन्कार केला आहे. प्रकृतीच्या कारणावरून ‘आप’ नेत्यांनी राजकारण करू नये असा उलटवार भाजपकडून करण्यात आला आहे.

तिहार प्रशासनाने सादर केलेल्या मुख्यमंत्री केजरीवाल यांच्या प्रकृतीच्या अहवालावरून ‘आप’चे खासदार संजयसिंह यांनी केंद्र सरकारवर जोरदार हल्ला चढविला आहे. ‘‘ गेल्या मार्च महिन्यापासून मुख्यमंत्री केजरीवाल हे मद्य धोरण गैरव्यवहारप्रकरणी तिहार तुरुंगात आहेत. तिहार प्रशासनाने मुख्यमंत्री केजरीवाल यांच्या आरोग्य तपासणीनंतर त्यांचे वजन ८ किलोंनी घटले असल्याचे म्हटले असून त्यांच्या शरीरातील साखरेचे प्रमाण ५० पेक्षा कमी झाले आहे.

शरीरातील साखरेचे प्रमाण इतके कमी झाल्यास व्यक्ती कोमात जाण्याची शक्यता असते. यामुळे तिहार तुरुंगात केजरीवाल यांच्या जिवाला धोका आहे,’’ असे संजयसिंह यांनी नमूद केले. दिल्लीच्या मंत्री आतिशी मार्लेना यांनीसुद्धा मुख्यमंत्री केजरीवाल यांच्या आरोग्यावरून भाजपवर हल्लाबोल केला आहे. मुख्यमंत्री केजरीवाल यांच्या प्रकृतीबाबत केंद्र सरकार गंभीर नसल्याचे त्यांनी म्हटले आहे.

‘आप’ने राजकारण करू नये : भाजप

‘आप’च्या नेत्यांचे आरोप मात्र भाजपने फेटाळून लावले आहेत. मुख्यमंत्री केजरीवाल यांच्या प्रकृतीची दररोज तपासणी केली जात आहे. यावेळी त्यांच्या पत्नी सुनीता केजरीवाल सुद्धा उपस्थित राहत आहेत. मुख्यमंत्री केजरीवाल यांच्या प्रकृतीची पूर्ण काळजी घेतली जात आहे. परंतु आपचे नेते आरोग्यावरून राजकारण करून जनतेची दिशाभूल करण्याचा प्रयत्न करीत असल्याचा आरोप भाजपने केला आहे.