सरकारी बंगल्यावरील कोट्यवधी रुपयांच्या खर्चाच्या पार्श्वभूमीवर भाजपने दिल्लीचे मुख्यमंत्री अरविंद केजरीवाल यांच्यावर पुन्हा हल्ला चढवला आहे. केजरीवालांचा बंगला सद्दाम हुसेन आणि किम जोंग यांच्या राजवाड्यासारखा असल्याची खिल्ली भाजपचे प्रवक्ते सुधांशू त्रिवेदी यांनी आज उडविली.

केजरीवाल यांचे सरकारी निवासस्थान आणि त्यावर झालेला खर्च यावरून भाजप सातत्याने हल्लाबोल करत आहे. आज पक्ष प्रवक्ते आणि राज्यसभा खासदार सुधांशू त्रिवेदी म्हणाले की, मुख्यमंत्री अरविंद केजरीवाल यांनी दिल्लीतील जनतेला लुटले आहे.

आपल्या आलिशान महालात केजरीवाल यांनी ज्या प्रकारे वैभव मांडले आहे, ते पाहता त्यांचा महाल सद्दाम हुसेन आणि किम जोंग उन यांच्या महालासारखा वाटतो, असा टोला त्यांनी लगावला. महालाबद्दल दररोज होणाऱ्या खुलाशांमुळे केजरीवाल यांचा खरा चेहरा आला आहे.