नलबारी - काँग्रेस आणि एआययूडीएफची आघाडी आसामचे सर्व दरवाजे घुसखोरांसाठी उघडेल. ही घुसखोरी रोखण्याचे काम केवळ भाजप करू शकतो. आम्हाला आणखी पाच वर्षे सत्ता द्या, राज्याला हिंसाचार, आंदोलने आणि पूर यांच्यापासून मुक्त करू, असे प्रतिपादन भारतीय जनता पक्षाचे नेते आणि केंद्रीय गृहमंत्री अमित शहा यांनी आज केले.

देशभरातील इतर बातम्या वाचण्यासाठी येथे क्लिक करा

आसाममध्ये यावर्षी विधानसभा निवडणूक होणार आहे. या निवडणुकीत काँग्रेसने युनायटेड डेमोक्रॅटिक फ्रंट (एआययूडीएफ) यासह पाच पक्षांची युती केली आहे. त्या पार्श्वभूमीवर नलबारी येथे भाजपतर्फे ‘विजय संकल्प’ या कार्यक्रमाचे आयोजन करण्यात आले होते. त्यावेळी बोलताना शहा म्हणाले, ``काँग्रेस नेहमीच भाजपवर जातीयवादी असल्याचा आरोप करते. मात्र काँग्रेसने केरळमध्ये मुस्लीम लीगसोबत आणि आसाममध्ये बद्रुद्दीन अजमल यांच्या  एआययूडीएफ पक्षाशी युती केली आहे. हे दोन्ही पक्ष धर्मनिरपेक्ष आहेत का?  आसाममध्ये गेली अनेक वर्षे काँग्रेस आणि एआययूडीएफचे सरकार होते. त्यांनी राज्यासाठी काय केले? १३ व्या वित्त आयोगाने आसामसाठी ७९ हजार कोटी  रुपये दिले होते, १४व्या वित्त आयोगाद्वारे भाजप सरकारने १.५५ लाख कोटी रुपये राज्याला दिले आहेत.`` 

ताज्या बातम्यांसाठी डाऊनलोड करा ई-सकाळचे ऍप

``बोडो विभागातील रस्त्यांच्या विकासासाठी ५०० कोटी रुपये देण्यात आले आहेत. रस्त्यांचे हे काम झाल्यानंतर हा संपूर्ण विभाग विकासाच्या मार्गावर असेल. आसाममध्ये नवे रस्ते तयार होत आहे, महाविद्यालये उघडली जात आहेत,. येत्या काही काळांत पुराच्या समस्येतून जनतेला बाहेर काढण्याचे कामही भाजपचे सरकार करेल, `` असे शहा म्हणाले.

पुढील लोकसभेच्या निवडणुकीत भाजप पुन्हा 
सत्तेत आली तर, देशभरातील ३५०० मशिदी ते पाडतील. ते पुन्हा सत्तेत आले तर, महिलांनी बुरखा वापरू नये, मुस्लिमांनी दाढी वाढवू नये आणि पारंपरिक टोप्याही घालू नयेत, यासाठी  प्रयत्न केले जातील. 
- बद्रुद्दीन अझमल, एआययूडीएफ

जगभरातील इतर बातम्या वाचण्यासाठी येथे क्लिक करा