भारतीय बँकांना गंडा घालून विदेशात फरार झालेल्या विजय मल्ल्या, नीरव मोदी आणि मेहुल चोक्सी यांना ईडीने मोठा झटका दिला आहे. भारतातील सार्वजनिक बँकामधून कोट्यवधी रुपयांचं कर्ज घेऊन या तिन्ही उद्योगपतींनी विदेशात पळ काढला होता. मागील काही दिवसांपासून या प्रकरणात तपास सुरु होता. ईडीनं कारवाई करत विजय माल्ल्या, नीरव मोदी, आणि मेहुल चौक्सी यांची 18 हजार 170 कोटी रुपयांची मालमत्ता जप्त केली होती. आज, बुधवारी यापैकी 9 हजार 371 कोटी रुपयांची संपत्ती ईडीने कर्ज बुडवण्यात आलेल्या सार्वजनिक बँका आणि केंद्र सरकारकडे हस्तांतरित केली आहे.

विजय माल्ल्या आणि पीएनबी बँक घोटाळा प्रकरणात सार्वजनिक बँकांची 40 टक्के रक्कम पीएमएलएनुसार जप्त केलेल्या शेअर्सच्या विक्रीतून वसूल करण्यात आल्याचं ईडीनं सांगितलं. अंमलबजावणी संचालनालयाने ट्विट करत म्हटले की, ईडीने फक्त पीएमएलएवुसार विजय माल्ल्या, नीरव मोदी आणि मेहुल चोक्सी प्रकरणात 18,170.02 कोटी (बँकाच्या एकूण नुकसानीच्या 80.45%) रुपयांची संपत्ती जप्त केली आहे. 9371.17 कोटी रुपये किंमतीची संपत्ती सरकारी बँकांना ट्रान्सफर करण्यात आली आहे.

बेहिशोबी मालमत्ता प्रकरणी ईडीने उद्योगपती विजय मल्ल्या, हिरे व्यापारी नीरव मोदी आणि मेहुल चोक्सी यांच्यावर संपत्ती निवारण अधिनियम २००२ अर्थात पीएमएलए कायद्यातंर्गत कारवाई केली.