कर्नाटक : सध्या महिलांवरील अत्याचाऱ्याच्या घटनांमध्ये वाढ होताना दिसत आहे. त्यातच आता कर्नाटकातील दक्षिण कन्नड जिल्ह्यात (South Kannada Karnataka) काही गुंडांचं लाजिरवाणं कृत्य समोर आलंय. काही बदमाशांनी आदिवासी महिलेला (Tribal Women) बेदम मारहाण केली आणि नंतर तिला विवस्त्र केलं, असा आरोप आहे. याप्रकरणी पोलिसांनी (Karnataka Police) 8 आरोपींविरुद्ध गुन्हा दाखल केलाय. सध्या या प्रकरणाचा तपास सुरू असून हे प्रकरण 19 एप्रिलचं असल्याचं पोलिसांनी सांगितलंय.

पीडित महिलेचं वय अंदाजे 35 वर्षे असल्याचं सांगण्यात येतंय. यामागं जमिनीशी संबंधित प्रकरण असल्याचंही बोललं जातंय. संदीप, संतोष, गुलाबी, कुसुमा, लोकैही, अनिल, ललिता आणि चन्नकेशव या आरोपींविरुद्ध पोलिसांनी गुन्हा दाखल केलाय. पोलिसांनी सांगितलं की, पीडित मुलगी आणि तिची मोठी बहीण कर्नाटक सरकारनं दिलेल्या जमिनीच्या एका भागात झोपडपट्टीत राहतात. काही आरोपी महिलेला जमीन देण्यास विरोध करत होते. महसूल अधिकारी तिथं पोहोचल्यावर आरोपींनी त्यांनाही विरोध केला. त्यानंतर अधिकारी तेथून निघून गेल्यावर आरोपींनी महिलेला मारहाण केल्याचं सांगण्यात येतंय.

पोलिसांनी दिलेल्या माहितीनुसार, हल्लेखोरांनी पीडितेच्या आईवरही हल्ला केलाय. आरोपी महिलेला मारहाण करून तिचे कपडे काढत असताना ग्रामपंचायत सदस्यांव्यतिरिक्त गावातील लोकही मूक प्रेक्षक बनून हा तमाशा पाहत होते. मात्र, यावेळी तिथं उपस्थित असलेल्या कोणीतरी या घटनेचा व्हिडिओ बनवून व्हायरल केला. दरम्यान, व्हिडिओच्या आधारे पोलिसांनी या प्रकरणाचा तपास सुरू केलाय. पोलिसांनी आरोपींविरुद्ध दंगल करणे, दुखापत करणे आणि महिलेवर बळाचा वापर केल्याप्रकरणी गुन्हा दाखल केलाय.