इंफाळ ः मणिपूरच्या विष्णूपूर जिल्ह्यामध्ये मध्यरात्री केंद्रीय राखीव पोलिस दलाच्या (सीआरपीएफ) छावणीवर दहशतवाद्यांनी केलेल्या हल्ल्यामध्ये दोन जवान हुतात्मा झाले तर अन्य दोघेजण हे गंभीर जखमी झाले असल्याची माहिती पोलिसांनी दिली. मोईरांग पोलिस ठाण्याच्या हद्दीमध्ये नाराणसेईना येथे हा हल्ला झाल्याची माहिती ‘इंडियन रिझर्व्ह बटालियन’कडून देण्यात आली. दहशतवाद्यांनी सुरूवातीला डोंगराळ भागातून ‘सीआरपीएफ’च्या छावणीवर गोळीबार केला त्यानंतर जवळून हल्ला करण्यात आला.

साधारणपणे मध्यरात्री साडेबारानंतर गोळीबाराला सुरूवात झाली होती. पहाटे २.१५ पर्यंत हा गोळीबार सुरूच होता अशी माहिती एका वरिष्ठ पोलिस अधिकाऱ्याने दिली. या गोळाबारामध्ये आसामच्या कोकराझार या जिल्ह्यातील रहिवासी उपनिरीक्षक एन. सरकार आणि पश्चिम बंगालच्या बांकुरा जिल्ह्यातील अरुप सैनी हे हेडकॉन्स्टेबल हुतात्मा झाले. अन्य एक निरीक्षक जादव दास आणि कॉन्स्टेबल अफताब दास हे या हल्ल्यामध्ये गंभीर जखमी झाले आहेत. जखमींवर इंफाळमधील ‘रिजनल इन्स्टिट्यूट ऑफ मेडिकल सायन्सेस’मध्ये उपचार सुरू असून दोघाजणांची प्रकृती धोक्याच्या बाहेर असल्याचे समजते. येथील ‘इंडियन रिझर्व्ह बटालियन’ला संरक्षण देण्यासाठी ‘सीआरपीएफ’चे जवान तैनात करण्यात आले होते.

जवानांवरील या भ्याड हल्ल्याचा मी निषेध करतो. राज्यामध्ये कायदा-सुव्यवस्था कायम ठेवण्यासाठी ते अहोरात्र मेहनत घेत असतात. हुतात्मा जवानांचे बलिदान वाया जाणार नाही.

- एन. बिरेनसिंह, मुख्यमंत्री मणिपूर