बिहारमधून (Bihar) एक मोठी बातमी समोर येत आहे. राज्याचे माजी मुख्यमंत्री जीतन राम मांझी (Bihar Former CM Jitan Ram Manjhi) यांच्या नातेवाईकावर काही लोकांनी हल्ला केलाय. यामध्ये एका तरुणाच्या डोक्याला दुखापत झालीय. जीतन राम मांझी यांनी सांगितलं की, त्यांची भाची केसरी देवी आणि तिच्या कुटुंबावर स्थानिक गुंडांनी हल्ला केलाय. या हल्ल्यात काही लोक जखमी झालेत. जखमींना उपचारासाठी स्थानिक रुग्णालयात दाखल करण्यात आलंय.

या घटनेनं संतापलेल्या जीतन राम मांझी यांनी जर आपल्यासोबत अशी घटना घडली असती, तर त्यांनी हल्लेखोरांवर गोळीबार करून 2 ते 5 जणांना ठार केलं असतं, असं म्हंटलंय. हिंदुस्थानी अवाम मोर्चा (HAM) प्रमुख जीतन राम मांझी त्यांच्या कुटुंबीयांची प्रकृती जाणून घेण्यासाठी रुग्णालयात पोहोचले होते.

बिहारचे माजी मुख्यमंत्री आणि हिंदुस्थानी अवाम मोर्चाचे (Hindustani Awam Morcha) प्रमुख जीतन राम मांझी पुढे म्हणाले, स्थानिक गुंडांसह सुमारे 25 लोकांनी माझी भाची केसरी देवी आणि तिच्या कुटुंबीयांवर हल्ला केलाय. माझी भाची पंचायत सदस्य आहे. माझ्यासोबत अशी घटना घडली असती, तर मी त्यांच्यावर (हल्लेखोर) गोळीबार केला असता आणि किमान 2 ते 5 हल्लेखोरांना ठार केलं असतं, असा थेट इशारा दिलाय. मांझी पुढं म्हणाले, माझी भाची केसरी देवी पंचायत समितीची निवडणूक जिंकलीय, यावर कोइरी समाजात नाराजी आहे. निवडणुकीच्या वैमनस्यातूनच ही घटना घडल्याचा आरोपही त्यांनी केलाय.