ज्ञानवापी मशीद वादावर वाराणसी कोर्टात सुनावणीदरम्यान ज्ञानवापी मशिद कमिटीने न्यायालयात मुघल सम्राट औरंगजेब आणि आदि विश्वेश्वर मंदिराबाबत मोठा दावा केला आहे. या मशीद परिसराच्या ASI सर्वेक्षणाची मागणी करणाऱ्या हिंदू उपासकांच्या याचिकेला विरोध करताना औरंगजेब क्रूर नव्हता तसेच त्याने कोणतेही विश्वेश्वर मंदिर पाडले नसल्याचे म्हटले आहे. (gyanvapi case varanasi court)

वाराणसी कोर्टमध्ये ज्ञानवापी मशिद समितीने "मुघल सम्राट औरंगजेब क्रूर नव्हता किंवा त्याने वाराणसीतील कोणतेही आदि विश्वेश्वर मंदिर पाडले नाही" असा दावा केला आहे.

तसेच ज्ञानवापी मशिदीच्या आवारात गेल्या वर्षी न्यायालयाने नियुक्त केलेल्या कमिशनर यांना 'शिव लिंग' सापडले असल्याचे देखील मशिदी कमिटीने नाकारले आहे . येथे सापडलेली वस्तू ही कारंजे/फौवरा आहे असे कमिटीने कोर्टात सांगितले आहे. लाइव्ह लॉने याबाबत वृत्त दिलं आहे.

काही दिवसांपूर्वी अलाहाबाद उच्च न्यायालयाने मोठा निकाल देत ASI (भारतीय पुरातत्व सर्वेक्षण) यांना मशीद परिसरात आढळलेल्या 'शिवलिंग'ची कार्बन डेटिंग करण्याची परवानगी दिली. मात्र यावेळी कोणतेही नुकसान होऊ नये, अशी सुचना न्यायलयाने केली आहे.

अलाहाबाद उच्च न्यायालयाने ज्ञानवापी मशीद परिसरात सर्वेक्षणादरम्यान सापडलेल्या शिवलिंगाची कार्बन डेटिंग चाचणी आणि वैज्ञानिक सर्वेक्षणासाठी दाखल केलेली याचिका मान्य केली आहे. यावेळी शिवलिंगाला इजा न करता त्याची कार्बन डेटिंग चाचणी करण्याचे आदेश न्यायालयाने एएसआयला दिले आहेत. वाराणसीतील न्यायालयाने कार्बन डेटिंग चाचणी घेण्यास नकार दिला होता. या आदेशाला याला उच्च न्यायालयात आव्हान दिले होते.

दरम्यान उच्च न्यायालयाने वाराणसी न्यायालयाचा आदेश रद्द केला आहे. न्यायमूर्ती अरविंद कुमार मिश्रा यांनी लक्ष्मी देवी आणि इतरांच्या याचिकेवर हा आदेश दिला आहे.