अयोध्येतील श्रीराम मंदिराखाली अनेक पुरातन मूर्ती आणि स्तंभ मिळाल्याचं समोर आलं आहे. राम मंदिर ट्रस्टचे महासचिव चंपत राय यांनी एक्स (ट्विटर) पोस्ट करत याबाबत माहिती दिली. मंदिरासाठी खोदकाम सुरू असताना या मूर्ती आढळल्याचं त्यांनी आपल्या पोस्टमध्ये म्हटलं आहे.

मंदिराचे अवशेष

चंपत राय यांनी याबाबत अधिक माहिती दिली नाही. मात्र, त्यांनी पोस्ट केलेल्या फोटोमधून हे एखाद्या मंदिराचे अवशेष असल्याचं दिसून येत आहे. यामध्ये कित्येक मूर्ती आणि मंदिराचे स्तंभ दिसून येत आहेत.

राम मंदिरात येणाऱ्या भाविकांना हे पुरातन अवशेष पाहता येणार आहेत. यासाठी हे अवशेष एका विशेष गॅलरीमध्ये ठेवण्यात येणार आहेत. सोबतच याबाबत अधिक माहिती देखील देण्यात येणार आहे. लाईव्ह हिंदुस्तानने याबाबत वृत्त प्रसिद्ध केलं आहे.

कधी होणार प्रतिष्ठापणा?

श्रीराम मंदिराची प्राणप्रतिष्ठापणा कधी होणार याबाबत जून महिन्यात अपडेट देण्यात आली होती. पुढील वर्षी १५ ते २४ जानेवारीदरम्यान पंतप्रधान नरेंद्र मोदी यांच्या हस्ते आयोध्येतील राम मंदिरात प्राणप्रतिष्ठा केली जाणार आहे. राम मंदिर निर्माण समितीचे अध्यक्ष नृपेंद्र मिश्रा यांनी एका वृत्तवाहिनीला यासंबंधी माहिती दिली. साधारणपणे २४-२५ जानेवारी २०२४ पासून सर्वसामान्य भाविकांना मंदिरात दर्शन घेता येणार आहे.