Ayodhya Ram Mandir : संपूर्ण भारतासाठी आज एक ऐतिहासिक दिवस आहे. गेल्या कित्येक वर्षांपासून श्रीरामभक्त ज्या क्षणाची प्रतिक्षा करत होते, तो क्षण आज आला आहे. आज दुपारी अयोध्येतील भव्य मंदिरात रामलल्लांच्या प्राणप्रतिष्ठेचा कार्यक्रम पार पडेल. यासाठीच्या आजच्या विधींना सुरूवात झाली आहे. विश्व हिंदू परिषदेचे प्रवक्ते शरद शर्मा यांनी याबाबतचे फोटो शेअर केले आहेत.

आजच्या या भव्य दिव्य अशा सोहळ्यासाठी सुमारे आठ हजार व्हीआयपींना आमंत्रण देण्यात आलं आहे. आज सकाळी ११ वाजेपासून मुख्य कार्यक्रमाला सुरूवात होणार आहे. यानंतर दुपारी १२ वाजून २० मिनिटांनी शुभ मुहूर्तावर रामलल्लांच्या मूर्तीची प्राणप्रतिष्ठा केली जाईल.

या मंदिरामध्ये आज सामान्यांना प्रवेश दिला जाणार नाही. सुरक्षेच्या कारणास्तव हा निर्णय घेण्यात आला आहे. २३ तारखेपासून हे मंदिर सामान्यांसाठी खुलं असणार आहे. देशातील नागरिकांनी आज अयोध्येत येण्याऐवजी आपल्या घरीच दिवाळी साजरी करावी असं आवाहन यापूर्वीच पंतप्रधान नरेंद्र मोदी यांनी केलं आहे.