उत्तर प्रदेशात बाराबंकी इथं भीषण अपघातात १३ जणांचा मृत्यू झाला आहे. डबल डेकर बसचा या अपघातात चक्काचूर झाला आहे. तर ज्या ट्रकला बस धडकली त्याचेही नुकसान झाले आहे. या अपघातात १३ जणांना प्राण गमवावे लागले असल्याची माहिती समोर येत आहे. पहाटेच्या सुमारास बस आणि ट्रकची धडक झाली. यात जवळपास २५ जण जखमी असून त्यांच्यावर रुग्णालयात उपचार सुरु आहेत.

याबाबत मिळालेली माहिती अशी की, देवा पोलिस ठाण्याच्या हद्दीतील माती रोडवर चुकीच्या दिशेने येणाऱ्या वाळूच्या ट्रकला बस धडकली. अपघातानंतर ट्रकचा चालक पळून गेला आहे. बस दिल्लीहून बहराईचला जात होती असे सजमते.

जखमींना बाराबंकीमधील ट्रामा सेंटरमध्ये दाखल केलं आहे. ज्यांची प्रकृती गंभीर आहे त्यांना लखनऊला पाठवण्यात येत आहे. घटनास्थळी पोलिस दाखल झाले असून रस्त्यावर गाड्यांचे पडलेले अवशेष बाजूला काढले जात आहेत.

अपघातानंतर राज्याचे मुख्यमंत्री योगी आदित्यनाथ यांनी शोक व्यक्त केला. त्यांनी मृतांच्या कुटुंबिंयांना प्रत्येकी २ लाख रुपये देण्याची घोषणा केली आहे. तसंच जखमींना उपाचारासाठी सर्व प्रकारची मदत केली जाईल. याशिवाय ५० हजार रुपये आर्थिक मदत देण्यात येईल असेही सांगितले.