नवी दिल्ली - गुजरातमधील २००२ च्या दंगलींवर ब्रिटिश ब्रॉडकास्टिंग कॉर्पोरेशनने (बीबीसी) बनविलेला माहितीपट म्हणजे निव्वळ "दुप्रप्रचाराचा हिस्सा" आहे, अशा शब्दांत भारत सरकारने आज संताप व्यक्त केला आहे.

नरेंद्र मोदी गुजरातचे मुख्यमंत्री असताना गोध्रा जळीत कांडाननंतर त्या संपूर्ण राज्यात भीषण जातीय दंगली उसळल्या होत्या व त्यात हजारो नागरिकांनी जीव गमावला होता. गुजरात दंगलीच्या चौकशीसाठी सर्वोच्च न्यायालयाच्या निर्देशानुसार स्थापन करण्यात आलेल्या समितीने मोदीयांना ‘क्लीन चिट' दिली होती. या प्रकरणात समितीला मोदींविरोधात कोणतेही पुरावे सापडले नाहीत याकडेही सरकारने लक्ष वेधले आहे.

सरकार अशा पध्दतीच्या माहितीपटांचे चित्रपटाचे समर्थऩ करू शकत नाही असे नमूद करून सरकारच्या वतीने सांगण्यात आले की बीबीसीचा पंतप्रधानांवरील माहितीपट अपप्रचार, पक्षपाती आणि वसाहतवादी मानसिकता दर्शवतो. असा माहितीपट २०२२ -२३ मध्ये तयार करण्यामागील ‘अजेंडा‘ काय आहे, हे आम्हाला माहिती नाही असेही केंद्राने म्हटले.

परराष्ट्र मंत्रालयाचे प्रवक्ते अरिंदम बागची यांनी या माहितीपटाबाबत तव्र नाराजी व्यक्त करताना सांगितले की पंतप्रधान नरेंद्र मोदींवर अलीकडेच प्रसारित झालेला बीबीसीचा माहितीपट हा २००२ च्या गुजरात दंगलीतील मोदींच्या नेतृत्वावर प्रश्नचिन्ह उपस्थित करणाऱ्या अपप्रचाराचा भाग आहे.

बीबीसीच्या ‘इंडिया: द मोदी क्वेश्चन्स ’ या दोन भागांच्या मालिकेवर देशभरातूनही तिखट प्रतिक्रिया आल्या आहेत. परराष्ट्र मंत्रालय प्रवक्त्याने नमूद केले की एखाद्या विशिष्ट उद्देशासाठी असे माहितीपट जाणीवपूर्वक तयार केले जातात आणि त्यामागे एक अजेंडा आहे जो चुकीच्या माहितीच्या मोहिमेचा भाग आहे असे आम्हाला वाटते.