नवी दिल्ली - कोरोनाला रोखण्यासाठी भारतात प्रतिबंधक लस दिली जात आहे. 16 जानेवारीपासून देशात लसीकरण मोहिम सुरु झाली असून आतापर्यंत 53 कोटी डोस देण्यात आले आहेत. सध्या देशात कोविशील्ड, कोव्हॅक्सिन आणि स्पुटनिक व्ही लस दिली जात आहे. तर फायजरची मॉडर्ना आणि जॉन्सनच्या लशींना मंजुरी मिळाली आहे. या सर्व लशी इंजेक्शनच्या सहाय्याने दिल्या जातात. आता यात एक अशी लस उपलब्ध होणार आहे जी नाकाद्वारे दिली जाणार आहे. भारत बायोटेकनं ही लस तायर केली आहे. कंपनीला लसीची दुसऱ्या टप्प्यातील ट्रायल घेण्यासाठी परवानगी मिळाली आहे.

दुसऱ्या टप्प्यातील ट्रायलला परवानगी मिळाली असून लवकरच क्लिनिकल ट्रायल सुरु होईल. जैवतंत्रज्ञान विभागाने दिलेल्या माहितीनुसार, लशीची पहिली ट्रायल ही 18 ते 60 वर्षे वयोगटातील लोकांवर करण्यात आली. ती यशस्वी ठरली आहे. नाकाद्वारे दिली जाणारी भारत बायोटेकची ही पहिली नेजल लस आहे. आता दुसऱ्या टप्प्यात ट्रायलसाठी परवानगी मिळाली आहे.

याआधीही जैवतंत्रज्ञान विभागाने म्हटलं होतं की, कंपनीला दुसऱ्या आणि तिसऱ्या टप्प्यातील ट्रायलला मंजुरी मिळाली आहे. तसंच ही कोरोनावर अशी लस आहे ज्या लशीची ट्रायल भारतात माणसांवर होत आहे. पहिल्या टप्प्यात ज्या व्यक्तींवर ट्रायल घेतली गेली त्यात संबंधित व्यक्तींवर फारसे दुष्परिणाम झाले नाहीत. तशा प्रकारच्या तक्रारीही आल्या नाहीत. त्याआधी करण्यात आलेल्या अभ्यासात लस सुरक्षित असल्याचं समोर आलं आहे. प्राण्यांवर घेण्यात आलेल्या ट्रायलमध्ये अँटिबॉडीज तयार होत असल्याचं दिसून आलं होतं.