भारत बायोटेकने आज (शुक्रवारी) एक एप्रिलपासून कोव्हॅक्सिन लसींच्या उत्पादनाचा वेग तात्पुरता कमी केला आहे. वेगवेगळ्या संस्थांना कोरोना लस पुरवठा करण्याचे बंधन होते. मात्र त्यांची मागणी कमी होत आहे. सर्व उत्पादन केंद्रातून मागील वर्षापासून कोव्हॅक्सिन लस तयार केली जात होती. कोविड महामारी नियंत्रणात आणण्यासाठी कोव्हॅक्सिसनचे उत्पादन सुरु होते, असे हैदराबाद येथील भारत बायोटेकने (Bharat Biotech) कंपनीने सांगितले आहे. कोव्हॅक्सिनच्या गुणवत्तेशी कधीही तडजोड कोणत्याही वेळी केली गेली नसल्याचे कंपनीने स्पष्ट केले. (Bharat Biotech Slow Down Its Covaxin Vaccine Producation)

भारतात कोरोना नियंत्रणासाठी दोनच लसींना गेल्या वर्षी केंद्र सरकारेन मान्यता दिली होती. एक होती सिरम इंस्टिट्यूट ऑफ इंडियाची कोव्हिशील्ड आणि दुसरी भारत बायोटेकची कोव्हॅक्सिन. जागतिक आरोग्य संघटनेने कोव्हॅक्सिन लसीला लवकर मान्यता दिली नव्हती. भारत सरकारने याबाबत आरोग्य संघटनेला विनंती केली होती. त्यानंतर भारत बायोटेकच्या या लसीला जागतिक मान्यता मिळाली.