अहमदाबाद : गुजरात विधानसभा निवडणुकीत दणदणीत यश मिळवल्यानंतर भाजपच्या विधिमंडळ नेतेपदी भूपेंद्र पटेल (वय ६०) यांची आज एकमताने निवड करण्यात आल्याने त्यांचा मुख्यमंत्रिपदाचा मार्ग मोकळा झाला. भूपेंद्र पटेल उद्या (ता. १२) मुख्यमंत्रिपदाची शपथ घेतील. आज संरक्षणमंत्री राजनाथ सिंह, बी.एस. येडियुरप्पा, अर्जुन मुंडा यांच्या प्रमुख उपस्थितीत झालेल्या बैठकीत भूपेंद्र पटेल यांच्या नावावर शिक्कामोर्तब करण्यात आले. दरम्यान, भुपेंद्र पटेल यांनी दुपारी राज्यपालांची भेट घेऊ सरकार स्थापनेचा दावा केला.

आज राजनाथसिंह यांच्या उपस्थितीत झालेल्या बैठकीत भूपेंद्र पटेल यांची विधिमंडळ नेतेपदी निवड करण्यात आली. तत्पूर्वी मुख्यमंत्री शपथविधीच्या तारखेची घोषणा भाजपकडून अगोदरच करण्यात आलेली आहे. भूपेंद्र पटेल आणि सी.आर. पाटील दिल्लीला जात असून ते पक्षश्रेष्ठींना शपथविधी सोहळ्याचे निमंत्रण देण्याबरोबरच गुजरात मंत्रिमंडळावर चर्चा करतील. यावेळी केंद्रीय नेतृत्वाकडून मंत्रिमंडळाच्या नावावर शिक्कामोर्तब केले जाईल. भाजपचे आमदार हर्ष सिंघवी म्हणाले, की गुजरात आमदारांनी भूपेंद्र पटेल यांची पुन्हा एकदा नेतेपदी निवड केली.