चंदीगढ : पंजाबमधील राजीनामानाट्य काही थांबायचं नाव घेत नाहीये. पंजाबच्या राजकारणात गेल्या काही महिन्यांपासून सुरु असणारी राजकीय उलथापालथ अजूनही थांबायला तयार नाहीये. गेल्या काही दिवसांपूर्वीच पंजाबचे मुख्यमंत्री अमरिंदर सिंग यांनी आपली नाराजी व्यक्त करत राजीनामा सोपवला होता. त्यानंतर कुणाला मुख्यमंत्री बनवलं जाईल, या शंका-कुशंकाच्या वातावरणात सरतेशेवटी नवं नाव म्हणून चरणजीतसिंग चन्नी यांना मुख्यमंत्री बनवलं गेलं. हे सगळं सुरु आहे ते म्हणजे काही दिवसांमध्येच येऊ घातलेल्या विधानसभा निवडणुकीच्या पूर्वी! त्यातच आता पंजाबमध्ये काँग्रेसला मोठा धक्का बसला आहे.

ज्यांच्या गळ्यात काँग्रेसने विश्वासाने प्रदेशाध्यक्ष पदाची माळ घातली होती त्या नवज्योत सिंग सिद्धू यांनी प्रदेशाध्यक्ष पदाचा दिला राजीनामा आहे. त्यांनी नुकतंच ट्विट करत हा राजीनामा जाहीर केला आहे. त्यांनी हा राजीनामा सोनिया गांधींकडे पाठवला आहे.

सुपूर्द केलेल्या राजीनाम्यामध्ये त्यांनी म्हटलंय की, माणसाचे चारित्र्य कोसळण्याची सुरुवात ही तडजोड करण्यापासून सुरु होते. मी पंजाबच्या भविष्या आणि कल्याणाबाबत तडजोड करु शकत नाही. त्यामुळेच मी पंजाब प्रदेश काँग्रेस कमिटीच्या अध्यक्षपदावरुन राजीनामा देतो आहे. मी काँग्रेसची सेवा करत राहिन.