Bihar Floor Test : बिहार विधानसभा (Bihar Assembly) अध्यक्ष विजय सिन्हा (Vijay Sinha) यांनी आज (बुधवार) आपल्या पदाचा राजीनामा दिला. त्यानंतर विधानसभेतील प्रचंड गदारोळ पाहता सभागृहाचं कामकाज आज दुपारी 2 वाजेपर्यंत तहकूब करण्यात आलंय.

बिहारमधील विधानसभेत नितीश सरकारनं (Nitish Government) आपलं बहुमत सिद्ध करण्यापूर्वी सीबीआयनं (CBI) नोकरीच्या घोटाळ्यामधील कथित जमिनीतील दोन आरजेडी खासदार, आमदारांसह अनेक नेत्यांच्या घरांवर छापे टाकले आहेत. सीबीआयचे वेगवेगळे पथक आज सकाळी आरजेडीचे राज्यसभा खासदार अशफाक करीम, फयाज अहमद, आमदार सुनील सिंह आणि माजी आमदार सुबोध राय यांच्या निवासस्थानी पोहोचलं.

रेल्वेत जमिनीच्या बदल्यात नोकऱ्या दिल्याप्रकरणी सीबीआय आरजेडी सुप्रीमो लालू प्रसाद यादव आणि त्यांच्या कुटुंबीयांच्या घरावर छापे टाकत असल्याचं सांगण्यात येतंय. तर, दुसरीकडं नितीश कुमार यांच्या नेतृत्वाखालील नवं सरकार आज विधानसभेत बहुमत सादर करणार आहे. त्याआधी विजय सिन्हा यांनी आज बिहार विधानसभेच्या अध्यक्षपदाचा राजीनामा दिला. राजीनाम्यासोबतच विजय सिन्हा यांनी उपसभापती महेश्वर हजारी यांच्या जागी नरेंद्र नारायण यादव यांचं नाव घेतलं की, ते सभागृहाचं कामकाज पुढं चालवतील. यावरून वाद निर्माण झाला आहे. कारण, नियमानुसार सभापती नाही तर उपसभापती सभागृहाचं कामकाज चालवतात.