पाटना - बिहारमधील मोतिहारीमध्ये मोठा स्फोट झाल्याची माहिती समोर आली आहे. रामगढवा येथील नरिलगिरी येथील वीटभट्टी चिमणीत स्फोट झाला असून या स्फोटात 7 जणांचा मृत्यू झाला आहे. तर ढिगाऱ्याखाली दोन डझनहून अधिक लोक अडकल्याची भीती व्यक्त केली जात आहे. (bihar blast in motiharis brick kilns chimney )

दुर्घटनेतील १६ जखमींवर रक्सौलमध्ये उपचार सुरू आहेत. या घटनेनंतर आजूबाजूच्या लोकांमध्ये गोंधळ उडाल्याचं पाहायला मिळालं. मदत आणि बचावकार्य सुरू आहे. घटनास्थळी स्थानिक पोलीस आणि अधिकाऱ्यांचे पथक दाखल झालं आहे. जखमींची प्रकृतीही अत्यंत गंभीर आहे.

वीटभट्टीवर स्फोटाचा आवाज दूरवर ऐकू आला, असं आसपासच्या लोकांनी सांगितं. या अपघातानंतर एसडीआरएफची टीम घटनास्थळी पोहोचली आणि त्यांनी बचावकार्य सुरू केलं, असं बिहार पोलीस मुख्यालयाकडून सांगण्यात आलं आहे. ठार झालेल्यांमध्ये 4 स्थानिक आणि 3 जण उत्तर प्रदेशचे रहिवासी होते. पोलीस सहकार्य करत असून आवश्यक ती मदत करत आहेत.

पंतप्रधान नरेंद्र मोदी यांनी या घटनेवर दु:ख व्यक्त केलं आहे. पंतप्रधानांनी ट्विटरवर केलेल्या ट्विटमध्ये लिहिले की, "मोतिहारी येथील वीटभट्टीवर झालेल्या अपघातात झालेल्या जीवितहानीमुळे व्यथित झालो आहे. पीएमएनआरएफ प्रत्येक मृतांच्या कुटुंबीयांना 2 लाखांची मदत जखमींना ५० हजार रुपये देण्यात येईल,असही मोदींनी ट्विटमध्ये म्हटलं आहे.