बिहारमधील लखीसराय मधील छठ घाटातून परतणाऱ्या एकाच कुटुंबातील सदस्यांवर अंदाधुंद गोळीबार केल्याची घटना समोर आली आहे. कबिया पोलीस ठाण्याच्या हद्दीतील पंजाबी मोहल्ला येथे अज्ञात हल्लेखोरांनी एकाच कुटुंबातील सहा जणांवर गोळीबार केल्याची माहिती समोर आली आहे. यामध्ये दोन भावांचा मृत्यू झाला असून 4 जखमींवर रुग्णालयात उपचार सुरू आहेत.

या घटनेनंतर परिसरात एकच खळबळ उडाली होती. गोळीबारात जखमी झालेल्या कुटुंबातील सर्व सदस्यांना तातडीने सदर रुग्णालयात दाखल करण्यात आले. येथे डॉक्टरांनी भाऊ असलेल्या दोन तरुणांना मृत घोषित केले. दोन्ही भावांच्या पत्नी, वडील आणि बहीण जखमी आहेत. डीएम अमरेंद्र कुमार, एसपी पंकज कुमार, एएसपी रोशन कुमार यांच्यासह पोलीस दल घटनास्थळी पोहोचले आणि घटनेची माहिती घेतली.

एकतर्फी प्रेमातून हल्ला

लखीसरायचे एसपी पंकज कुमार यांनी सांगितले की, एकाच कुटुंबातील सहा जण छठ घाटावरून परतत होते. त्यांच्या घराजवळ त्यांच्यावर गोळ्या झाडण्यात आल्या. आशिष चौधरी असे आरोपीचे नाव आहे. दहा दिवसांपूर्वी हल्लेखोराचा या कुटुंबाशी वाद झाला होता. लखीसरायच्या पोलीस अधीक्षकांनी दिलेल्या माहितीनुसार, हे प्रकरण एकतर्फी प्रेमाचे आहे.

(Latest Marathi News)

आशिष चौधरी नावाचा तरुण आपल्याच घरासमोर राहणाऱ्या मुलीवर प्रेम करत होता आणि तिच्याशी लग्न करू इच्छित होता. पण मुलीच्या घरच्यांचा याला विरोध होता. यामुळे संतापलेल्या तरुणाने मुलीच्या कुटुंबीयांवर गोळीबार केला. शशिभूषण झा, दुर्गा झा, लवली देवी, प्रीती देवी यांना गोळ्या लागल्या. (Marathi Tajya Batmya)