पाटना- बिहारच्या जमुई जिल्ह्यातून एक धक्कादायक प्रकार समोर आला आहे. सिकंदरा पोलिसांनी एका फेक आयपीएस अधिकाऱ्याला अटक केली आहे. मिळालेल्या माहितीनुसार, तो दोन लाख रुपये देऊन आयपीएस अधिकारी बनला होता. पोलिसांनी आरोपी तरुणाला पकडून जेव्हा चौकशी केली, तेव्हा धक्कादायक खुलासे समोर आले आहेत.

मिथलेश कुमार हा लखीसराय जिल्ह्यातील हलसी पोलीस स्टेशन हद्दीतील गोवर्धन बीघा गावाचा रहिवाशी आहे. मिथलेश कुमार आयपीएसची वर्दी घालून आणि कंबरेला पिस्तुल लटकवून आपल्या दोन लाख रुपयांच्या बाईकवरून शहरात फिरत होता. एका कामामुळे तो सिकंदरा चौकात काही कामासाठी थांबला आणि तेथेच त्याचा भांडाफोड झाला.

आयपीएसच्या वर्दीतील व्यक्ती दिसल्याने लोकांनी त्याला पाहण्यासाठी गर्दी केली. पण, मिथलेश कुमार याचे हावभाव आणि त्याची भाषा वर्दीला साजेशी नव्हती. त्यामुळे काही लोकांना संशय आला. त्यांनी लगेच सिकंदरा पोलीस स्टेशनचे अधिकारी मिंटू कुमार सिंह यांना याबाबत कळवले. पोलीस घटनास्थळी आले आणि काही प्रश्न विचारून तात्काळ मिथलेश कुमार याला ताब्यात घेण्यात आले.

मिथलेश कुमारने केले धक्कादायक खुलासे

मिथलेश कुमार याने पोलिसांना दिलेली माहिती धक्कादायक होती. त्याने पोलिसांना सांगितले की, मनोज सिंह नावाच्या एका व्यक्तीने त्याला पोलिसात नोकरी देण्याची ऑफर दिली होती. पोलिसात नोकरी लावून देण्यासाठी त्याने दोन लाख तीस हजार रुपयांची मागणी केली होती. यासाठी मिथलेशने आपल्या मामाकडून दोन लाख रुपयांचे कर्ज घेतले. पोलीस बनू या आशेने त्याने हे पैसे दिले होते.

मनोज सिंह याने मिथलेश कुमार याच्या शरीराचा माप घेतला. त्यानंतर त्याला दुसऱ्या दिवशी बोलावून त्याला आयपीएस अधिकाऱ्याचा गणवेश, बॅच आणि पिस्तूल दिली. पोलिसांचा गणवेश मिळाल्याने मिथलेश कुमार खुश झाला. त्याने घरी येऊन आपल्या आईचे आशीर्वाद घेतले.

मनोज सिंहने मिथलेश कुमारला उर्वरित पैसे देण्यासाठी बोलावले होते. त्यामुळे तो तीस हजार रुपये घेऊन मनोज सिंहला भेटण्यासाठी जात होता. पण, वाटेत तो सिंकदरा चौकात थांबला अन् सर्व काही उघडं पडलं. पोलिसांनी मिथलेश कुमारला अटक केली आहे. याप्रकरणी तपास सुरु आहे. यामागे कोणता गट कार्यरत आहे का? याबाबत पोलीस तपास करत आहे.