दिल्लीचे मुख्यमंत्री अरविंद केजरीवाल यांनी आज सकाळी 11 वाजता आपल्या निवासस्थानी सर्व आमदारांची बैठक बोलावली आहे. मात्र, त्यापूर्वी एक महत्त्वाची माहिती सूत्रांकडून समोर आली असून, आमच्या काही आमदारांशी संपर्क होऊ शकलेला नाहीये. त्यामुळे महाराष्ट्रापाठोपाठ दिल्लीतही भाजपचे ऑपरेशन लोटस सुरू झाल्याच्या चर्चेने जोर धरला आहे.

भाजपच्या ऑपरेशन लोटस अंतर्गत अशा स्थितीत आम आदमी पक्षाला भाजप आपले आमदार फोडेल की काय अशी शंका आहे. त्यामुळे काल संध्याकाळी आम आदमी पक्षाच्या राजकीय घडामोडी समितीच्या बैठकीत सर्व आमदारांचा समावेश करण्याचा निर्णय घेण्यात आला. या बैठकीला आम आदमी पक्षाचे किती आमदार पोहोचतात याकडे सर्वांचेच लक्ष असणार आहे. दिल्लीत आम आदमी पक्षाचे एकूण 62 आमदार आहेत. 11 वाजता मुख्यमंत्र्यांच्या निवासस्थानी ही बैठक होणार आहे.

दिल्लीत दारू धोरण घोटाळ्यावरून संघर्ष सुरू आहे. दिल्लीत पक्षाचे आमदार विकत घेण्याच्या प्रयत्नात भाजप अपयशी ठरला आणि ऑपरेशन लोटस उघड झाल्याचा आम आदमी पक्षाचा दावा आहे. काल, आपचे काही आमदार पत्रकार परिषदेतून बाहेर आले आणि त्यांनी दावा केला की त्यांना भाजपकडून 20-20 कोटींची ऑफर देण्यात आली होती आणि इतर अनेक आकर्षक आश्वासनेही दिली होती. 'आप'च्या दाव्यावर भाजपने म्हटले की, उत्पादन शुल्क धोरणाबाबतचे आरोप टाळण्यासाठी आम आदमी पक्ष अशा खोट्या गोष्टी पसरवत आहे.

भाजपने आमच्या आमदारांना धमकावलं आणि आमची २० कोटी रुपयांची ऑफर स्वीकारा नाहीतर सिसोदिया यांच्यासारख्या सीबीआय खटल्यांना सामोरे जा, असं संजय सिंह यांनी बुधवारी म्हटलं होतं. भाजपने 20-25 आमदारांच्या संपर्कात असल्याचा दावा केला आहे. त्यात आता केजरीवालांनी बोलवलेल्या बैठकीपूर्वी आपच्या काही आमदारांशी संपर्क होत नसल्याचे अनेक तर्कवितर्कांना उधाण आले आहे.