कोलकता : भाजपमध्ये असताना बाबुल सुप्रियो यांनी तृणमूल काँग्रेसवर टीका करण्यासाठी गायलेले गाणे भाजप पोटनिवडणुकीच्या प्रचारात वापरणार आहे. सुप्रियो आता तृणमूल काँग्रेसतर्फे निवडणूक रिंगणात आहेत.बालीगंज मतदारसंघासाठी पोटनिवडणुकीचा प्रचार सुरू झाला आहे. या मतदार संघातून तृणमूल काँग्रेसने बाबूल सुप्रियो यांना उमेदवारी दिली आहे. आता त्यांच्या विरुद्ध प्रचार करताना भाजप त्यांनीच गायलेल्या गाण्याचा आधार घेणार आहे.

`हे टीएमसी नो मोर` हे २०२१ च्या विधानसभा निवडणुकीत अत्यंत लोकप्रिय होते आणि भाजपने प्रचारात त्याचा वापर केला होता. आता पुन्हा एकदा याचा वापर भाजप करणार आहे. राज्यमंत्री सुव्रत मुखर्जी यांच्या निधनामुळे बालीगंजची जागा रिक्त झाली होती. बाबुल सुप्रियो हे असनसोलचे भाजप खासदार होते, त्यांनी आपल्या जागेचा आणि पक्ष सदस्यत्वाचा राजीनामा दिला आणि तृणमूल काँग्रेसमध्ये प्रवेश केला. तृणमूलने असनसोलमधून चित्रपट अभिनेता शत्रुघ्न सिन्हा यांना उमेदवारी दिली आहे. भाजपने आता फॅशन डिझायनर अग्निमित्रा पाल यांना शत्रुघ्न सिन्हा यांच्याविरुद्ध उमेदवारी दिली आहे.

बालीगंजमध्ये, तृणमूलने दिवंगत सुव्रत मुखर्जी यांच्या स्मृती सभेचे रविवारी आयोजन करून प्रचाराची सुरुवात केली आहे. या मतदार संघात बाबूल सुप्रियो यांच्याविरुद्ध भाजपने किया घोष यांना रिंगणात उतरविले आहे.