कोलकता : तृणमूल काँग्रेसच्या खासदार महुआ मोईत्रा यांनी भाजपला पुन्हा प्रत्युत्तर दिले आहे. भाजप हिंदू देवतांचा रक्षक नसून पक्षाने बंगाली लोकांना देवीची पूजा कशी करायची, हे शिकवू नये, अशा शब्दांत त्यांनी सुनावले. त्या एका वृत्तवाहिनीवर बोलत होत्या. कालीमाता ही माझ्यासाठी मांसभक्षण करणारी व मद्यसेवन करणारी देवी आहे, असे मत त्यांनी ‘काली’ या माहितीपटाच्या वादग्रस्त पोस्टरबाबत बोलताना व्यक्त केले होते. त्यावरून वाद निर्माण झाला होता.

मोईत्रा म्हणाल्या, की मी या विषयावर एका परिपक्व राजकारण्याप्रमाणे व्यक्त झाले आहे. उत्तर भारतात देवतांची पूजा कशी होते, त्यावरून भाजपने बंगालबाबत मते व्यक्त करू नयेत. देशाच्या इतर भागांत देवतांच्या पूजाअर्चेची पद्धत वेगळी आहे. भाजप स्वत:चा हिंदुत्वाचा अजेंडा इतर वांशिक गटांवर लादत आहे. देशाच्या फायद्यासाठी त्याचा प्रतिकार करायला हवा. कालीमातेची भक्त असल्याने मला तिची पूजा कशी करायची हे माहीत आहे. ज्या भाजपशासित राज्यांत आपल्याविरुद्ध ‘एफआयआर’नोंदले गेले आहेत, अशा राज्यांनी कालीमातेला दिल्या जाणाऱ्या प्रसादाबद्दल न्यायालयात प्रतिज्ञापत्राद्वारे माहिती द्यावी, असे आव्हानही त्यांनी दिले.